陳百祥上港台節目講「瞓街論」惹網友嬲嬲　監製：唔評價嘉賓表現

相信大家都好清楚陳百祥（阿叻）嘅真正嗜好係咩，唔係講緊賽馬同足球喎，我係講緊用把口認叻呢樣嘢。今日下晝，阿叻喺港台節目《視點31》裡面繼續發揮牙擦擦本色。喺節目開冇耐，身為職業高爾夫球協會名譽會嘅阿叻，就質疑參與房屋、地政事務多年嘅黃遠輝，係咪適合擔任土地小組主席：「揸Fit嗰個叫黃遠輝，佢只係做Banker，只係識炒股票、睇外匯，點識土地？」

阿叻又爆惹火言論　「美國人都要瞓街」

之後，阿叻好快就直斥高爾夫球場起住宅係荒謬：「房屋就係房屋，運動就係運動。」但講完冇耐佢又話部分高球場地改成住宅用途非不可行：「拎少少出嚟絕對唔介意，但最好唔郁，我哋幾多小學生學緊波，仲有17萬從業員，嗰啲人咪會失業？」阿叻亦話香港住屋問題一直都存在，自己亦住過劏房：「你嚟得香港住，就要接受香港從來都係貴嘅地價㗎嘞，而家講緊西雅圖，美國人都要瞓街，而家（香港人）都係瞓細啲嘅房，細啲嘅廳。」講真，呢句嘢真係幾勁，本身就明明講緊香港嘅土地問題，而佢就拉到去西雅圖咁遠，聽完真係唔知點應好。

網友話阿叻又呃嬲　監製唔評嘉賓表現

睇完節目或者相關報道後，好多網友都話阿叻又喺度「呃嬲嬲」。咁其實港台方面係唔係特登搵阿叻，博佢又講出位言論呢？《視點31》監製唐敏明接受《香港01》訪問時，就話搵阿叻上嚟節目，只係因為阿叻係代表緊高爾夫球愛好者嘅立場：「佢講嘅嘢，一定會有人同意，同時亦都一定有人唔同意。」咁會唔會覺得阿叻嘅言論太Over？監製就答：「我唔會評價各個嘉賓嘅表現，我只多謝佢哋願意上嚟討論。」

曾話黃之鋒八大不入　「跪低論」向網民挑機

其實一直以嚟阿叻講嘅嘢都真係好爆，好似2015年佢上港台節目《我係乜乜乜》時，佢就狠評黃之鋒：「八間大學都考唔到，我點話你叻呀？」又話自己如果今日後生啲，就有機會做到facebook創辦人；如果自己係90後，更加有機會做到特首呢個位置。搞到黃之鋒又忍唔住喺網上回應：「陳百祥冇讀大學兼會考得13，咪照樣做咗一線藝人。」阿叻嘅威水史雖然不能盡錄，但大家最深印象都應該係台慶挑機件事，當時好多人都因為香港電視網絡（HKTV）拎唔到牌照，就打算喺TVB台慶當晚發起罷睇行動，而阿叻就公然向網民挑機：「如果熄機可以令TVB只有2、3收視，我就跪低，一路由將軍澳跪到返屋企。」