胡子彤歐鎧淳拍拖出活動 行外母政策：女孩子都要氹嘅
撰文：吳子生
出版：更新：
胡子彤同女友歐鎧淳罕有孖住出席品牌活動，唔通有好消息要公佈？胡子彤一聽到就緊張起嚟話：「今晚有個好緊要嘅事情要公佈，就係Auntie生日，所以一陣要同佢食飯，我地準備咗小禮物送畀佢。」氹得Auntie咁開心, 係咪行緊外母政策呢？子彤謙厚說：「唔敢唔敢，女孩子都要氹嘅，不論係媽媽，女朋友，甚至我姪女都要氹，所以我都要學下。」
歐鎧淳孖住男友胡子彤出席活動（吳子生攝）
歐鎧淳近日在IG上放閃，show長腿就被指係「機心腳」，fans紛紛留言讚好，鎧淳調皮回應：「唔關我事呀，佢幫我影嘅！」子彤笑說：「係我幫佢影嘅，成班朋友去遊船河，你知女仔要貪靚啦，要影啲靚相㗎，咁我經常俾人話我影相影得差，今次OK啲啦。」所以話千其唔好自滿，話口未完就俾女友窒啦：「因為你係影咗相百幾張相囉。」子彤續說：「show長腿放閃，有人讚佢喎⋯，咁梗係好啦，好事嚟㗎，我好少讚佢㗎。」氹得旁邊女朋友開懷大笑。
胡子彤為鎧淳媽咪慶祝生日（吳子生攝）
情侶之間拍拖時候，經常做嘅事係乜？相信就係用手機影情侶相啦，鎧淳坦言：「佢影相就麻麻嘅，不過佢又好肯影，呢樣野就好難得，努力後天可以補救。」子彤搶說：「相唔怕影，影百幾張總會有一張中，咁多位男士放膽影相啦！」成個訪問完全體會到咩叫做打情罵俏！完全感受得到。