【多功能老婆】陳寶華點評幾位主角:千嬅自然、柏豪夠Sharp

撰文:
最後更新日期:

寶華姐日前在香港知專設計學院擔任講座嘉賓,多位好友,包括洪永城、黃浩然、唐文龍、米雪以及導演麥當傑現身撐場,更到台上齊齊傾偈。(黃國立攝)

無綫重頭劇《多功能老婆》目前拍攝得如火如荼,劇組月初更前往日本東京取景。劇集總監製兼「金牌編劇」陳寶華,日前出席由將軍澳香港知專設計學院舉辦的「港劇如何再創高峰?」並擔任主題講座嘉賓,期間寶華姐談到自己早於2003年開始北上內地發展,今次因為無綫派出「兩大天王」── 助理總經理(非戲劇製作)余詠珊以及副總經理(節目及製作)杜之克出手,成功邀請已在中國大陸紮根的寶華姐回港開劇,她解釋今次願意返娘家,完全出於對港劇的一份感情:「因為有一啲演員我想再合作啦,又(想)見返啲以前啲同事啦,同埋因為我係港劇養大,所以自己對港劇係有啲感情嘅,雖然我而家上去內地,做咗好多國產電視劇,但(港劇)仍然係我嘅根,我係想劇好嘅。」

《多功能老婆》是寶華姐回歸無綫開拍的重頭劇,邀得千嬅飾演藍飛一角,而黃浩然和周柏豪分別飾演尚劍雄以及榮浩田。(資料圖片)

寶華姐覺得,網、台(OTT點播與電視頻道)聯播的新趨勢,為港劇帶來新機會,亦是她回港開拍《多功能老婆》其中一個契機。(資料圖片)

內地人愛看原裝粵語版港劇

今時今日人人北望神州,大陸劇強勢,港劇漸見邊緣化,惟寶華姐覺得,網、台(OTT點播與電視頻道)聯播的新趨勢,為港劇帶來新機會,亦是她回港開拍《多功能老婆》其中一個契機:

「而家港劇有網台聯播呢個資源之後,我哋嘅港劇係會去到成個中國都睇到,仲可以係粵語,因為佢哋(內地觀眾)唔介意睇粵語,我自己覺得,我哋都想做啲好啲嘅作品,(劇集)喺成個神州落地之後,變成一個大啲嘅市場,令到人哋多啲接受港劇,我覺得,一啲資深港劇人係應該出一啲力囉。」

言即並非她一個人出力便成事,而是同業是否願意付出。「每人出一掌,每人出幾個月時間,咁就好好㗎喇,即係指點吓,或者畀啲信心呢一個行業囉,我希望好多喺內地嘅精英,可以抽少少時間咁樣做。」

我覺得賺錢咪去賺人民幣囉,但有陣時都可以花啲時間喺返香港拍電視劇嘅。
金牌編劇陳寶華

寶華姐直言北上多年,事業已在內地紮根,今次回港拍《多功能老婆》只因自己對港劇有感情。(黃國立攝)

力讚洪永城、朱晨麗有喜感

提到《多功能老婆》的陣容,除了一眾甘草,包括黃錦燊、梁舜燕、張國強、苗可秀之外,戲份最重的幾位演員 ── 楊千嬅、周柏豪、洪永城、朱晨麗幾位,都不是一致公認的演技派,甚至有網民覺得有些「戲屎」,到底寶華姐點樣睇?她說自己初步看過一些新劇片花,直認他們的演技令她非常驚喜,並逐個點評。

「千嬅做得非常自然,非常之好,我相信呢個戲,係會令大家對佢有一個新嘅睇法,柏豪好多場戲我都重睇,實在太Sharp喇。朱晨麗同洪永城係有驚喜嘅,朱晨麗剪短咗個頭髮之後,同洪永城喜感係好強,我相信觀眾會鍾意佢哋囉。」看來寶華姐對這套回歸力作信心十足。

周柏豪在《多功能老婆》飾演黃錦燊的兒子。(資料圖片)

周柏豪的演技向來一般,惟寶華姐力讚他在《多功能老婆》的表現令她相當驚喜。(資料圖片)

隨時準備為雯女寫劇本

非演技派也可以有好的演出,寶華姐認為,既要歸功於團隊合作,亦要有賴好劇本,「因為我嘅戲係用劇本來幫演員,亦要演員自己吸收到,呢個係互相嘅,係(兩者)配合得非常好,因為每個演員我都係望住佢。我好開心,因為原來我係有三個戲嘅Cast喺我一個戲裏頭。」

有傳《多》劇由雯女鄧萃雯擔鋼,後來變成千嬅,惟雯女解釋指《多》劇本不太適合自己,寶華姐指,她和雯女能否如願開新劇合作,還看天時地利人和:「除咗我同雯女本身之外,都要睇唔同嘅平台或者係製作人嘅撮合,我絕對覺得,鄧萃雯係演過我好多劇嘅一個好演員,點樣再令到觀眾好期待睇佢呢?我覺得係要投資方呀,或者平台嘅配合,如果我個劇本佢係鍾意嘅話,我係會為佢度身寫嘅,我隨時準備好!」但劇本方向和創作細節,寶華姐指現階段仍然是商業秘密,不便透露。

寶華姐回歸無綫,開拍重頭劇《多功能老婆》,最初有傳這部戲原本由鄧萃雯當女主角,惟千嬅暗中搶走,雯女對此哭笑不得:「係唔需要搶,都要睇個劇本啱唔啱我先得,我同寶華姐私底下好熟,有聽過個劇本,套戲叫《多功能老婆》,咁我又唔係老婆,下次開套叫靚女可能先啱我。」(資料圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。