【姊妹檔】湯洛雯靚聲獻唱《小幸運》 倪晨㬢抗拒合唱
撰文：賴家杰
出版：更新：
人氣女神湯洛雯及網紅女神倪晨㬢（Elva）今日再度以「姊妹檔」造型出席活動，二人「異父異母姊妹」形象一早已成為網絡熱話，因而令二人人氣急升，帶畀佢哋更多工作機會。二人岀席活動時更透露已經有合作計劃，至於係乜計劃呢？二人訪問中說道：「其實我哋已經打算學跳舞，會學類似Kpop嘅舞蹈畀大家睇啦！」Elva更同大家講唔好睇佢哋咁嘅樣，其實佢哋係唔識跳舞，「我哋擺動作就可以，但要我哋跳就好雞手鴨腳！」
人氣女神湯洛雯及網紅女神倪晨㬢（Elva）今日再度以「姊妹檔」造型出席活動。（黃國立攝）
今日現場湯洛雯更獻唱兩首歌曲，其中一首係人氣歌曲《小幸運》，而唱歌方面對靚湯嚟講就冇乜難度，但身為姊妹嘅Elva做咩唔一齊合唱呢？相信一起合唱效果會更佳，Elva就笑言會好驚，而在旁嘅靚湯就安慰Elva，「唔使擔心，有我會陪妳。」不過，Elva都係婉拒，更話喺台下做粉絲舉牌就好了！
今日現場湯洛雯獻唱兩首歌曲，其中一首係人氣歌曲《小幸運》。（黃國立攝）
一直都有指羅天宇對湯洛雯念念不忘，而近日靚湯就在個人社交網站upload咗一段歌詞，令大家就誤會佢憑歌寄意回應上一段感情。對於呢一件事靚湯都感到唔好意思，「我自己upload呢段歌詞只係純粹覺得好好聽，想分享一下畀大家，大家第二日就作咗一個好似係真嘅故事，咁就話佢想復合，但其實冇呢一件事，我哋都仲係好好朋友，我都有同佢講唔好意思，佢仲笑我話首歌咁舊宜家先聽。」至於復合方面靚湯就表示唔去想啦！因為要以事業為重。
湯洛雯對於大家誤會佢喺社交網站upload歌詞係回應同羅天宇嘅感情，感到十分唔好意思，而Elva就開心同粉絲自拍。（黃國立攝）