【天命】小德子戴耀明成史上「最彎公公」:太攰彎到想瞓

撰文:
最後更新日期:

無綫熱播中清裝劇《天命》愈播愈緊湊,嘉慶(譚俊彥飾)同和珅(陳展鵬飾)的關係進入白熱化,好演技睇到電視友都咬牙切齒。其實除了他們之外,其他看似唔起眼角色的演員亦絕對為該劇增添了唔少分數,就好似在嘉慶身邊的太監小德子(戴耀明飾)咁,如果有留意,會發現戴耀明成日企唔直,好似條腰有事,集集都70度以上彎低條腰,彎到幾乎見唔到樣,原來這個細節是戴耀明刻意加落去,目的是想小德子這個角色更加傳神。

戴耀明彎到幾近見唔到樣。(網上圖片)

過去歷史因為太監是卑微之人,因為身份低等關係當面對自己主子的時候,絕對要低頭,突顯主子高高在上的光環。而戴耀明就好明白這一點,在拍好此角色之前都對古代太監了解一番:「以前清朝下人太監﹑宮女,其實一年真正望主子的樣唔係望好多次,好多時都是彎腰偷望唔會話企直說話,所以基本上在宮中他們是最卑微的。」正正因為了解所以先做得如此出色。

戴耀明因為睇過歷史,所以對於今次公公角色作出調整,昨晚因為有對白,所以抬起頭。(網上圖片)

有睇《天命》的都知道,戴耀明跟著嘉慶全程無時無刻都呈現80%彎腰,彎到幾乎都睇唔到他樣子,正正因為太彎搞到他被導演話:「都有導演話彎得滯,個頭抬高小小,因為無晒面口變咗老臨喎,同埋有時太累仲彎,不過無所謂皆因有對白就可以見樣,如果要做反應可以略略調教冇咁彎,同埋嘉慶嗰角色係相當強勢,我成日都喺佢隔離,我咁彎就突出到主子同下人關係,所以影唔影到我面口無乜所謂,最緊要突出到皇帝,觀眾一望落去就好feel到佢萬人之上。」睇嚟他已經彎出一套心得啦!問到有冇咩特別有趣經歷,原來他試過彎到睡著:「有一次太累彎彎地,個人有一點想睡一剎那向前彎多咗小小,但冇人發覺不過是NG Take。」認真搞笑。

全程呈現一個彎的姿態睇見他都覺得辛苦:「其實都幾累的,有時彎成晚7﹑8個鐘,有時NG就上來休息一吓。其實彎有一個好處可以笑都唔覺的,好似于洋(紀曉嵐)讀聖旨太長有文言文,無可能背得多他就讀ABC…好多人忍唔住笑,就冇發覺我笑。」

戴耀明都認成日彎腰都好累。(網上圖片)

正正因為過去做了幾次太監從未試過咁彎,因為知道歷史對太監的描述如此,所以他今次就作出了一個新嘗試,雖然辛苦不過都值得,亦幸好同劇的嘉慶教他幾招瑜伽伸展拉筋動作,令他身體變得更自如,他自己都想唔到原來對方是有瑜伽牌的,TVB的確是一處卧虎藏龍的地方。

原來因為彎腰問題,有時偷笑都冇人知。(網上圖片)

嘉慶仲過幾招瑜伽給他,令他舒服許多。(劇照)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。