【書展2018】村上小說下架 Ben Sir堅嬲：真係為嗰幾行字而禁？
撰文：翁漢瓏
出版：更新：
歐陽偉豪（Ben Sir）今日現身書展，為伍倩彤（Gillian）首本個人寫真集宣傳撐場，Ben Sir解釋原來是「一雞兩味」，宣傳新書兼推廣新劇。「因為我同Gillian嚟緊有一套網劇會上，套劇將會以神探伽利略查案嘅方式去演繹廣東話文化，今日嚟算係半撐半宣傳啦！」
書展應該以書本為主導，但近年見到愈來愈來寫真在會場推出，問到Ben Sir對寫真有何看法，他表示：「其實今時今日寫真喺香港已經唔係咩新鮮嘢，我都已經麻木咗，而且『寫真』喺日本只係代表攝影集，貿發局又畀佢哋擺嘅，即係暴露極都有限，冇咩問題，就唔似村上春樹有本書被人禁咗，小弟嘅《粗口小講堂》亦都被禁。」
Ben sir 談及小說出版的審查制度愈發嚴謹，尤其提到村上春樹小說遭下架一事頗為不滿。（賴家杰攝）
談及書展舉行期間有新書被禁，包括曾獲諾貝爾文學獎提名的日本著名作家村上春樹，其長篇小說《刺殺騎士團長》遭淫審處評為第二類不雅物品，需暫時下架，本身都有出書的Ben Sir明顯有怨言：「我嗰本《粗口小講堂》被禁都冇乜嬲，反而係村上嗰本，係咪真係需要為咗嗰幾行字而禁呢？同埋佢都係慣咗咁嘅表達手法，所以我覺得比較奇怪，但感覺好似出版自由一步一步被收窄咁，而家唔係話政府對於寫真出版審查太鬆，而係佢地對其他作品太嚴格，好希望佢哋可以有一個統一標準去審查作品。」
問到Ben Sir出書是想宣掦廣東話還是為䁠錢，他表示：「我主要係想宣掦廣東話，咁啲書賣得多自然係好啦，不過既然依家有出版商資助，又有人肯做，希望大家多多支持，趁呢啲嘢仲未式微可以支持下。」
Ben Sir為伍倩彤首本個人寫真集宣傳撐場，期間分享出書經驗時提到出書最困難是談廣東話之餘，必須克制自己不提及政治。（賴家杰攝）