舒淇鄭秀文聚會　梁洛施爆囝囝手指拗出唔拗入

梁洛施〈Isabella〉自從今個月宣布全面復出，不時都會喺IG同網友開心share日常生活。日前，Isabella就孖住鄭秀文、舒淇、馬詩慧同二女王麗嘉齊齊素顏去到經理人Kim屋企聚會。

梁洛施久休復出再戰演藝圈：係時候返嚟我嘅演藝事業

幾位大忙人難得聚埋一齊，都有各自post相兼留言話玩得好開心，Isabella仲分享咗同囝囝嘅小對話：「去食飯之前囝囝問我今晚我哋同邊個食飯，我話去Auntie Kim屋企同幾個姐姐食飯lol, 佢問我咁D〈啲〉姐姐係唔係好似你咁都係拍戲架（㗎）? 我話係呀。有一個叫Auntie Janet係Super Model嚟㗎。」講完之後，Isabella就拎咗Sammi張相俾囝囝睇，仲問道：「媽咪型啲定Sammi姐姐型啲？」估唔到囝囝二話不說就話Sammi姐姐型啲。

呢個時候Isabella仲唔心息，再攞舒淇張相問：「舒淇姐姐靚啲定係媽咪靚啲？」囝囝繼續食咗誠實豆沙包話：「Wow，舒淇姐姐靚啲！」完全估唔到囝囝手指拗出唔拗入嘅Isabella唯有同返囝囝講，媽咪覺得你好乖同好誠實，你要keep住咁樣知唔知道！最後，Isabella都忍唔住話：「真係俾佢激死！」