【專訪】前亞姐吳嘉星闖荷里活不止做演員　寫埋劇本為亞洲人爭氣

前亞姐吳嘉星（Kathy）兩年前放下在香港的8年成績，孤身一人返回她的成長地美國加州，踏上荷里活的銀色旅途。在當地達成兒時夢想並沒有令Kathy放下腳步，更令她清楚自己未來的路向，她不諱言自己正在撰寫劇本，希望將一些與亞洲人的故事帶入西方世界：「我喺廣州、香港、紐約同洛杉磯生活過，體驗同觀察過唔同城市嘅人嘅生活，我好想將呢啲嘢寫出嚟再講畀大家聽。我覺得荷里活嘅亞裔演藝人員係需要自己爭取機會，講自己想講嘅嘢。依家平台多咗、成本細咗，點解唔趁機會講自己想講嘅嘢、唔做自己想做嘅事？」

Kathy透露劇本主要圍繞一對父女，他們在生活上各有睇法，後來爸爸再婚，與女兒關係開始疏遠，令雙方之間的鴻溝更深、更闊，是一個關於「被忽略」的故事。她坦言回港的一段時間，除了敘舊，還有將劇本交由黃秋生和林家棟兩位金像影帝評價：「秋生哥覺得OK，認為個劇本做到以小見大，用到個好細嘅例子反映到社會現象，家棟哥都畀咗好多意見，我哋差唔多坐咗個鐘頭，講咗好多劇本上嘅嘢。」她又坦言劇本是先有英文版再譯成中文版，打算在洛杉磯和香港取景，亦指自己會爭取擔任導演一職。

至於返回荷里活後的工作安排，Kathy指自己會上兩個課程，其中一個課程的導師更是里安納度狄卡比奧（Leonardo DiCaprio）的老師：「上佢堂都要Audition！佢會睇你履歷至決定收唔收你，太Green嘅話佢可能會叫遲少少先再上堂，『蜘蛛俠』Tobey Maguire都嚟Sit堂！另外一個課程就即興喜劇，又係要考入去先可以讀，成班得我一個亞洲人，考咗三次先入到班，相信一定會學到好多嘢。作為一個亞洲演員，一定要增值先有機會。」

提到荷里活始終是白人主導，問亞洲演員會否輸蝕，甚至受歧視？Kathy指自己不大感覺到有歧視的情況：「近年亞洲演員嘅機會愈來愈多，十年前嘅荷里活，亞洲演員可能來來去去都係嗰幾個。雖然情況係好咗，但始終都要爭取更多機會，中國人、亞洲人可能比較內斂，唔會好積極咁去爭取，但依家係時候去為自己發聲，講我哋自己想講嘅嘢。」