【Plan B.專訪】吳嘉熙後悔曾令母親受傷害:佢當時成日打我鬧我

撰文:
最後更新日期:

ViuTV劇集《Plan B》集荒誕與奇情於一身,情節走向更是出人意表,當中擔任女主角的吳嘉熙(Cheronna)便在戲中策劃了一場綁架案,而「肉蔘」竟然是Cheronna自己!原因只為向一個男人實行復仇大計,兵行險著,既大膽又黑暗。

Cheronna接受《香港01》訪問時坦言這個充滿陰暗面的角色難度極大:「佢將所有嘢都收埋晒,抑壓晒所有情感,喺唔同情況會畀唔同嘅面貌你睇到,而嗰面又唔係佢真正嘅一面。」問她會否覺得自己似角色般黑暗?她直指角色比她厲害得多:「我冇佢咁犀利,我試過憎一個人憎到想殺死佢,但我唔會實行,佢可以收埋個嬲樣,但係我唔得,我覺得佢咁樣已經好變態。」

吳嘉熙在《Plan B》中為實行報仇大計綁架自己,她坦言這種黑暗角色好難演。(葉志明攝)

+4
+3
+2

從未實行報仇大計 但會衰衝動傷害人

曾經有文章便指出不少成功CEO都擁有心理變態者的性格特質,或許在這個社會中生存,變態才是致勝之道,但Cheronna從不覺得自己是一個變態的人:「因為我一嬲就有個嬲樣,你會見到我唔出聲,好容易畀人睇得出我有啲嘢。」她的確完全不符合做變態復仇者的必要條件,連第一關都過唔到:「我最黑暗都應該係得個『諗』字,如果我男朋友(黃奕晨)背叛我,我最多都係話畀全世界聽佢背叛我。(剪咗佢嘛!)都好喎,但係一定好痛。」

或者以「衝動復仇者」來形容Cheronna會比較貼切,而這種性格亦的確令她身邊不少人受傷,而首個被她報復的受害者竟然是其母親:「我讀幼稚園時,我曾經同我媽咪講『我死咗你就開心啦』,因為當時我係覺得媽咪成日鬧我,好似好唔需要我,又成日打到我飛起想殺死我咁,所以如果我唔存在喺呢個世界上,佢會開心好多。當佢聽到我咁講後,佢就好傷心咁話『如果你死咗我點會開心』,我就意識到我講咗句唔應該講嘅說話。」

吳嘉熙坦言小時候試過用言語令母親傷心,全因為覺得母親對她又打又罵。(葉志明攝)

+7
+6
+5

同理心總有失手時 不夠冷靜趕走好心人

人愈大便愈明白到別人亦有難處,Cheronna在待人接物上亦改進了不少,但始終總會失守,總有衝動性格戰勝同理心的時候:「我嘅隊友都成日同我講要冷靜啲,其實呢個性格令我幾蝕底,我諗真係有一啲幫助我嘅人,因為我嘅衝動令到雙方喺工作上有衝突,搞到轉咗幫第二個人。」但她坦言自己在Super Girls中卻是比較少與人嘈交:「我哋會打千字文溝通,而我係負責睇!同埋有兩個好叻鬧交嘅人喺度,我唔會同佢哋講道理。」至於兩人的真正身份,Cheronna就笑住話要賣關子。

雖然長大了已經學識待人處事,但吳嘉熙亦覺得自己行事比較衝動。(葉志明攝)

+3
+2

踏入片場感覺生疏 不敢稱自己作演員

提到Cheronna在《Plan B》中是「萬綠叢中一點紅」,問陸駿光、王宗堯等演員會否充當哥哥特別照顧她?她坦言指自己從來不想令自己顯得需要被照顧:「有時我好唔知點做個角色,覺得件事好Confusing,佢哋就會過嚟同我傾,教我點樣處理呢個場口,叫我調整自己呼吸,等我可以進入到個狀態。」她亦指自己感到如此壓力最主要是因為她足足4年未有演戲:「我對上一次做戲已經係《女人俱樂部》,隔咗成4年,我係完全唔記得演戲嘅感覺,我發現一冇咗呢個感覺係好大鑊,加埋呢個角色唔易做。呢個角色令我醒覺到一樣嘢,就係就算我冇演出機會,我都唔可以丟低演戲。今次我係極度唔滿意自己表現,因為我覺得自己需要付出好大努力先達到個情節,同時我覺得自己係演個角色,而唔係變成個角色,所以我唔敢講自己係一個演員,第一冇乜經驗,第二唔夠專業。」為了克服困境,她不斷報讀相關課程,她亦好多謝男友肯為她在演技上排難解憂。

雖然吳嘉熙在《Plan B》中有所突破,但她不太滿意自己的表現。(葉志明攝)

+4
+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。