【兄弟大茶飯.專訪】蕭正楠曹永廉爆兄弟大鑊:佢哋好污糟邋遢

撰文:
最後更新日期:

TVB 最新飲食節目《兄弟大茶飯》一推出即大受歡迎,網民大讚兩位主持曹永廉(阿廉)和蕭正楠(老蕭)互窒夠過癮,節目形式夠新穎。這是第一個阿廉和老蕭兩兄弟拍住上的節目,過程雖然辛苦,但更多的是回憶,阿廉說:「我哋係賣人情味同誠意。」

曹永廉(阿廉)和蕭正楠(老蕭)首次有自己二人的節目《兄弟大茶飯》,為求表現真性情,沒有度稿,二人互窒大開黃腔,令觀眾看得過癮。(林迅景攝)

「我哋想真性情,唔想有做緊嘢嘅感覺,希望好似真人騷咁,但當然唔可以講到過晒界啦,都係睇幕後同事點剪㗎啫。」阿曹說,所以二人在拍攝過程中想到什麼便說什麼,就是他們的日常寫照,阿蕭說:「我哋唔想跟稿講對白,一路煮一路嘈交隨時就嚟,有時呢啲先好笑,咁大家都覺得,原來你兩兄弟把口都幾賤㗎喎,點知佢哋把剪又咁鬆,所以大家先睇到咁多踩界對話。」

阿廉和老蕭大爆幾個兄弟把口都唔收。(林迅景攝)

如果說TVB的女子組閨蜜代表是「胡說八道會」,那麼男子組代表應該就是「太監五虎」(黎耀祥、曹永廉、蕭正楠、黃浩然、陳國邦),阿廉說成班兄弟隔兩天就聯絡一次,說說八婆是非,這樣的相處,有時比女生之間的相處還要冤氣。阿廉和老蕭在節目中把口唔收,經常有「踩界」言詞大開黃腔,二人大爆其他兄弟亦不遑多讓:「其實唔只我哋兩個,黎耀祥、黃浩然把口都好賤,大家見開佢哋斯文一面,其實內裡好污糟邋遢。」阿蕭:「上次《公公出埠》,我同浩然激到阿廉動真火,當時仲roll緊機,影低晒佢啲黑面,我向浩然打眼色,唔好玩得咁過火,但浩然係一個好鐘意欺凌別人嘅人,如果佢喺學校應該係技安嗰啲學生,所以佢無視我,繼續欺凌阿廉。」但阿蕭亦說:「踩到盡先係真兄弟吖嘛。」而「五虎」就是這樣相處,踩完大家又無事。

「太監五虎」結緣始於劇集《大太監》。(視覺中國)

要二人數對方一個優點,起初阿廉和老蕭還互相打趣,只讚對方今日個頭set得靚,但講遘吓,又讚不停口,阿廉說:「我哋係拍《大太監》嗰時識,佢個名之前都聽過嘅,唱歌㗎嘛,但唔係熟嘅,但好多幕後工作人員讚佢醒目,我都幾期待識到呢個人,可以同我對到兩咀,嗰時拍《大太監》就撻著咗。佢好孝順,好鍚阿媽,對朋友好好,但佢好揀朋友,啱傾嗰啲佢會對人好好,唔啱傾嗰啲,咪寒暄兩句咁囉。」

老蕭被阿廉大爆在交友方面很揀擇。(林迅景攝)

輪到老蕭說:「阿廉好錫身邊嘅人,任何人,無論係咩職位,佢好關心,無論係工作上定屋企有事,佢都係第一時間去幫人,有次我要搬屋,佢係第一個舉手話幫我,仲幫我揸幾轉車,我覺得佢真係好好人,所以佢咁得人鐘意。」

咁缺點呢?阿蕭說:「我覺得阿廉闊佬過龍。佢以前請太多人食飯,使咗好多錢,有時明明唔關佢事,有時佢經過又幫人埋埋單;有時一班人食飯,佢成日行咗去廁所,佢永遠去完廁所返嚟,張單已經埋完。」

雖然兩人經常窒對方,但其實暗地裡很欣賞大家。(林迅景攝)

但要數到「埋單王」,應該非黎耀祥莫屬,阿廉和老蕭都說,最開心是跟祥仔吃飯:「佢真係我哋師傅嚟㗎喎,有大食大,《大太監》嗰時係我人生嘅低潮,我無拍劇一段時間,阿祥知我哋成班都唔係搵得錢多,餐餐飯都係阿祥同阿嫂畀錢,佢話:『得啦,遲啲先你畀啦,搵多啲錢先啦。』我覺得佢兩公婆心地好好,就算係依家,佢哋都仲係成日叫我哋留啲錢買多件衫,佢嚟請。」

黎耀祥非常關照後輩,與太太經常請大家食飯。(視覺中國)

雖然老蕭說浩然是小霸王,經常蝦人,但其實佢好「有雷」(義氣),老蕭說:「如果佢當你兄弟,佢一定會企你前面保護你,同埋佢會好關心人,佢同你拍劇嘅時候,會睇住你,留意你有咩甩漏,衫歪了,頭唔靚,佢即刻同你講。」阿廉說:「佢又會提你拍緊戲時對眼唔好周圍望,好煩,但佢係好心。」

黃浩然雖然被老蕭大爆是小霸王,同時亦獲讚份人好「有雷」(有義氣),兄弟有難,一定會為兄弟擋子彈。(視覺中國)

《兄弟大茶飯》已經深入TVB同事心,現在只要見到阿廉同老蕭,同事都會問:「係咪做緊大茶飯呀?係咪有飯食呀?」得到同事的愛戴,二人都好有滿足感,阿廉說:「我哋成日上內地拍劇都會思鄉,會好掛住香港,掛住香港嘅食物,我哋特登上去內地探班,煮好多香港食物畀同事食,好多平時唔頊意上鏡嘅同事,今次都好肯上鏡,讚吓啲菠蘿包好食,杯珍珠奶茶好飲,見到佢哋咁開心,我哋好有滿足感,估唔到個迴響咁大。」做得如此成功,會不會開第二季?阿廉老蕭說工作已經排到年底,所以今年內再開的機會不大,大家好好珍惜餘下幾集喇!

+6
+5
+4


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。