朱晨麗被指靠百億前度向上流：好hurt，清者自清！

朱晨麗主演的新劇《特技人》熱播當中，除了劇中的演技備受關注之外，朱晨麗以往的情史亦被翻炒。當中她與百億電子大王劉紀明的戀情最為轟動，雖然二人拍拖兩年，並於16年正式分手。但最近就有報道指，朱晨麗在男方身上學會投資，現已是坐擁千萬豪宅的小富婆！

被指靠前富豪男友，朱晨麗回應《香港01》稱：「其實好無奈，講真一句「清者自清」！雖然呢排因為《特技人》多咗人認識亦多謝觀眾有留意到「may豬」呢個角色，但睇到呢啲新聞我都會唔開心，好hurt，因為好多嘢都唔係事實。」有傳她2014年曾與百億電子大王劉紀明相戀，同年豪擲7百萬買入現時價值千萬的將軍澳兩房單位，亦靠男方的關係而認識幾位闊太，前年更與她們一齊於淺水灣開高級畫廊，朱晨麗表示：「唉，唔好玩啦，一千萬叫豪宅呀？你哋真係未見過豪宅，講真㗎！住劏房又話睇唔起，投資又寫得咁樣衰，究竟想點？其實我都係普普通通搵一個地方做自己的安樂窩，真係無需要誇大。至於畫廊，係同教會嘅朋友開嘅。」

對於日前被影到與闊太行街，朱晨麗就笑言：「嗰日同媽咪行街，同屋企人行街，點解每個舉動都寫出嚟咁負面，明明好溫馨。咁樣寫真係講真一句，唔係咁有良心囉！」朱晨麗2011年入行至今，參與過唔少重頭劇包括：《名媛望族》、《衝上雲霄II》和《超時空男臣》等，如今終於憑《特技人》擔正成為TVB力捧花旦，買樓應該都不是難事。