鄭秀文盼劉德華創傷後遺症早日復原：希望時間可以幫佢
撰文：朱奕錦
出版：更新：
鄭秀文（Sammi）今日（4日）出席一個二手網站活動，捐出幾件二手貨品為慈善籌款，雖然數量不多，不過好快已經賣出去，反應好好：「我估有兩個原因啦，第一就係上呢個網站買嘢嘅人都唔係好計啲嘢係咪最當季嘅，第二就係其實佢哋定價都係比我想象中平嘅。」既然個市咁好，Sammi也表示會考慮再捐，笑言在這之前自己已經買了多件復古首飾：「我甚至未去考究係幾多年前嘅design，覺得靚就買。」作為明星，通常好多衣褲鞋襪、手袋等都只會用一兩次就閒置，咁又真係有啲浪費，不過Sammi稱現在好多服飾有贊助，着完之後就好似「灰姑娘」，12點就退還，反而她自己啲衫就會着好耐：「我唔介意重複，同埋過季嘅嘢對我嚟講唔重要嘅，最緊要係你另外配搭囉。」
Sammi以復古打扮亮相二手網站活動，坦言自己不介意重複着衫，最緊要識得配搭。（陳順禎攝）
日前劉德華在演唱會記招上自揭墮馬後有創傷後遺症，唔知Sammi有沒有給好友啲意見呢？「咁我當然希望時間可以幫佢克服呢個恐懼症啦，始終咁恐怖嘅事，我諗發生喺我身上，我都唔多唔少會有啲陰影，咁希望佢慢慢喺呢個陰影裡面可以復原囉。」講到擔任華仔演唱會嘉賓一事，Sammi則興奮表示「如果華仔有需要，我絕對義不容辭！」
Sammi希望華仔早日走出墮馬創傷後遺症，如對方開聲邀請做嘉賓，自己將義不容辭。（陳順禎攝）
近排Sammi有同大家在Big Big Channel玩直播，難得參與此類活動的她受到網友熱烈歡迎，Sammi也樂在其中，還直言可以嘗試玩下其他範疇的直播：「我自己都有諗過嘅，不過未諗到直播啲乜，唔想因為直播而直播囉，我想嗰啲內容係可以充實小小，同埋真係可以生活化小小。（同安仔生活的live？）咁又唔使生活化到咁，太真實啦。」
Sammi直言有想過玩直播，例如煮餸、化妝等等範疇，不過暫時未想好內容。（陳順禎攝）