【後生仔傾吓偈】馮盈盈轉述偏激嫁有錢人論惹嘩然：唔代表我立場

馮盈盈 (Crystal) 一向好敢言，仲不時會爆出金句，甚至給人一種語不驚人誓不休的感覺。她日前於有份主持的無綫節目《後生仔傾吓偈》中，就發表了「係雞係公廁論」。當Crystal與另一主持麥明詩講到港姐嫁有錢人時，她表示：「如果我哋嫁畀有錢人，就畀人話睇死佢啦！想吊金龜啦！係雞，係公廁！」此話一出，隨即惹來極大的迴響，不止大班網民叫身為港姐冠軍的Crystal要慎言，就連歷屆的港姐師姐包括莊思明以及朱潔儀都有批評Crystal的「係雞係公廁論」。

莊思明就直指作Crystal作為公眾人物唔應該咁講：「成個感覺好cheap，對自己形象唔好，亦有損港姐嘅形象，仲會影響年青人嘅諗法。」又認為Crystal可以用其他字眼去表達，不需要用如此激進來搏出位。而朱潔儀就話：「冇聽過人哋咁講港姐，咁肉酸㗎！唔應該宣揚唔真實嘅訊息。」

另外，楊洛婷就笑言：「或者係代溝，可能細路女，講吓笑啫。」陳庭欣就話Crystal的言論應該是節目效果：「佢講嘢冇保留、夠貼地啫，監製佢哋審批完話出得就OK啦！」

而事後Crystal都有再為自己的「係雞係公廁論」解畫說：「我當時係轉述緊一啲網民好偏頗同好主觀嘅言論，佢哋真係用呢啲字眼，但唔係代表我嘅意見同立場，我自己並唔認同呢啲言論，係持反對意見嘅。有時外界係用兩把尺嘅標準去衡量我哋女仔或者女藝人，咁其實對我哋女性係好唔尊重同唔公平。女仔去搵自己想要嘅婚姻，有乜問題？女仔係有權利去選擇自己幸福嘅。我係為女權平反，希望大家公開討論同正視。」

對於被指用詞太激，Crystal說：「睇返網上攻擊女性嘅用詞，再粗鄙啲、露骨啲同更具攻擊性啲都有，我只係引述出嚟討論，咁點解喺網上攻擊人冇問題，拎上節目講就有問題？」不過她就話自己都會檢討一吓，而今次引起大家討論，也可以藉此睇吓電視用字的呎度去到邊。Crystal的拍檔麥明詩同陸浩明亦力撐她。

睇返啲節目Cap圖，FYY真係有咁講㗎。