【颱風山竹】卓韻芝無懼風雨嫁愛郎 不怕山竹搞亂檔:又名夫妻果

撰文:
最後更新日期:

卓韻芝(阿芝)今日舉行西式婚禮,邀請圈內外好友一齊開Party,有最強姊妹團陪嫁,阿芝接受訪問時更直言超級颱風「山竹」令她的婚姻更順利,而鄭秀文(Sammi)、梁詠琪(Gigi)、蔡卓妍(阿Sa)亦有會見傳媒,三人著上統一粉紅色系但不同款裙,各具優點, Sammi型格,Gigi優雅,阿Sa活潑清麗。

現場採訪:吳子生、協力:陳栢宇

才女卓韻芝和從事電影美術的「閃電俠」梁子賢今日(15/9)在中環外國記者會舉行婚禮。新娘阿芝在晚上九點左右接受傳媒訪問,她直言整個過程都令她非常緊張:「我冇諗過自己都會眼濕濕!(先生都好緊張?)佢一定緊張啦,佢唔係幕前,對住公眾咁多人講嘢喎!佢尋晚已經好緊張,係咁講『聽日娶老婆、聽日娶老婆、聽日娶老婆』。」又謂事前不知道老公發展感言時會講甚麼:「我係第一次聽,知道對佢嚟講家庭真係好重要,佢話佢以佢爸爸做榜樣,我都聽得眼濕濕。」

今日結婚的卓韻芝坦言因為老公的講辭而眼濕濕。(黃國立攝)

問婆婆見到孫女終於出嫁是否倍感高興,阿芝即笑指婆婆最開心是可以飲酒:「其實幾日前佢見到我着褂佢已經好開心,而家佢最愛嘅嘢都喺晒度,所有親戚都喺加拿大、挪威兩度返晒嚟,我婆婆可以一次過見晒所有女、孫同埋曾孫。(婆婆有冇同你講啲咩?)佢話兩公婆最緊要係互相忍讓、互相禮貌對待。我都有問佢婚姻係咩,而佢都有一段好美滿既婚姻,直至有一日公公離開咗仙遊,不過婆婆就唔知呀,見步行步!即係每段婚姻都有唔同處境,要保持住學習心態。」又笑指婆婆經常催他們生B亦坦言要等工作辦妥後才可以去阿根廷度蜜月。

卓韻芝坦言要待棟篤笑完騷、老公的電影工作亦完成後,才可以抽時間到阿根廷度蜜月。(黃國立攝)

提到超級颱風「山竹」襲港,問他們會否擔心影響婚禮?阿芝就指從來沒有特別擔心過:「天嘅嘢擔心唔嚟,我都有問我先生有冇擔心,佢話唔擔心,佢有念力!其實我都有搵過山竹到底係咩植物,我先知原來佢又名『夫妻果』,所以都算畀咗個機會我哋順利開到個Party。」

卓韻芝指自己從不擔心颱風「山竹」對婚禮造成影響。(黃國立攝)

之前阿芝形容自己是「佛系新娘」,對婚禮細節不太執著,做過多次姊妹的阿Sa 也笑稱這次做姊妹是史上最輕鬆的一次:「我哋應該係最舒服嘅姊妹團,因為新娘都無特別要求我哋做啲咩,是最輕鬆的一次。」最到無得玩新郎會不會覺得可惜,Gigi說:「不可惜,如果真係畀我哋玩,佢哋就會覺得好可惜,最好不要,我覺得今晚都幾簡單,但係隆重,我哋係直接嚟飲,就無玩新郎。同埋新娘都好隨意。」Sa指新郎相比之下就顯得比較緊張,兄弟團也一樣緊張,她更大讚新郎「真人靚仔過上鏡」,比起阿芝的熱情奔放,新郎則比較害羞,Sammi笑指她們是負責來搞笑的。

卓韻芝結婚,有天后影后陪嫁,認真夠威!(黃國立攝)

問到婚禮中有沒有哪個時刻令姊妹們覺得感動,Sammi 笑說:「佢嫁得出我已經好感動!」阿Sa 被記者問,今晚是否負責接花球,Sammi 馬上說:「肯定啦,我哋接來都無咩意義㗎喇。」阿Sa也說身邊的好姊妹都嫁得七七八八,今日還特地問助手:「我啲朋友結晒婚未㗎?佢話『應該仲爭容祖兒』。」Sammi 笑說:「咁你要快過佢!」阿Sa則指隨遇而安。

阿Sa 笑指今次做姊妹係史上最輕鬆。(黃國立攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。