【再創世紀】劇中做「女兵」做到暈 鄧佩儀:我都會無條件付出!

撰文:
最後更新日期:

熱播劇集《再創世紀》中為了延續《創世紀》的精神,在劇中安排周柏豪、袁偉豪及鄧佩儀組成「新三劍俠」。劇中暗戀程凱(周柏豪飾)的朱小慧(鄧佩儀飾),一直為對方付出所有,在所不辭。日前播出的劇情中,程凱要小慧連夜趕製「按摩背心」,令她過勞而暈倒街頭。

「朱小慧真係一個不可多得的女仔,佢嘅內在美係100分,無可挑剔!」鄧佩儀接受《香港01》訪問時除了稱很欣賞朱小慧這個角色亦透露自己也曾暗戀人,她稱:「當然我現實中在有暗戀過人啦,有一點我覺得我同「朱小慧」都幾似,就係當鄧佩儀真係鍾意一個人嘅時候,我都會無條件咁樣去付出,我都會無論做咩都想佢好啦,買嘢都會諗咗佢先啦,各樣嘢都會為佢付出而唔介意佢唔知嘅。以前我都暗戀過一個好肯定佢唔會鍾意我嘅人,最尾我哋都係保持朋友關係,雖然知自己無咩可能,但一直都會喺佢身邊對佢好,呢樣我覺得自己同朱小慧好似,但當然戲中我會再放大少少,等佢同程凱可以突出啲。」

劇中小慧暗戀程凱足足十年,唔知最後有無好結果呢?(《再創世紀》劇照)

雖然會為對方付出所有,但鄧佩儀就從未覺得自己是「兵」,她表示:「我覺得為鍾意嘅人做嘢就唔稱得上「做兵」,因為如果真心鍾意一個人,無論佢鍾唔鍾意你都好,佢開心你都會開心。嗰陣我都為「佢」做過好多嘢,喺佢身邊幫忙、喺佢身邊聽佢訴苦、買任何嘢,一對情侶會互相幫對方做的嘢都做過。」

以為鄧佩儀俾人追得多,估唔到都有佢得唔到嘅男人。〈IG圖片〉

這次為了演好「朱小慧」鄧佩儀亦付出不少心血,她透露:「呢個男仔頭角色算係我所有演過的角色最難的一個,首先佢係由細到大喺深水埗大,始終我係外國讀書,但我一定要好地道。因為角色是係一個單親,同Daddy長大的一個人,所以我係比較Man同地道,我都用咗兩日留喺鴨寮街觀察佢哋平時點做嘢、講嘢嘅Tone同埋佢哋的企姿坐姿,我都盡量學齊晒,所以拍攝嗰三個月,無論去邊我都保持自己有幾麻甩有幾麻甩。(特登剪埋短頭髮?)其實個短髮係為咗《誇世代》剪嘅,好可惜我最後受咗傷拍唔到,但好彩「賽翁失馬,焉知非福」好返之後,就接到呢個角色,就覺得個短髮同「朱小慧」呢個角色襯到絕!我亦都好感謝袁偉豪同周柏豪,佢哋真係好nice,拍攝嗰真係好開心,戲內戲外都好似「三劍俠」好兄弟,所以變咗有好強烈的火花。」

+3
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。