容祖兒大頭蝦快閃韓國 行街食飯勁甩漏:去食人蔘雞點知變咗地盤

撰文:
最後更新日期:

容祖兒(Joey)日前受化妝品牌邀請,快閃韓國,仲同韓國天團BIGBANG成員勝利見面𠻹。Joey乘機同同樣受到邀請嘅老死黃偉文(Wyman)周圍又飲又食又買,不過向來大頭蝦嘅祖兒喺當地亦都繼續甩漏,真係好搞笑。

Joey雖然已經去過韓國四次,但從來都沒去過「東大門」,「冇去過佢哋傳聞中最神聖嘅東大門,噚日食完飯,最後一個晚上,我聞到我嘅化妝師、髮型師、助手,好似有一股想去東大門嘅興緻,我就話不如我都一齊去。」Joey跟大隊處女踏足東大門,覺得非常新奇有趣。不過出名大頭蝦嘅佢,去Shopping都唔記得帶錢,只能說不令人意外!「的確我係大開眼界嘅!因為嗰度真係包羅萬有,但最好笑嘅地方係我冇錢!冇韓圜亦都冇港幣、又唔俾碌卡,最後我助手俾咗二千蚊我買嘢,哈哈,咁我就要揀得好挑剔、好審慎咁去買,買咗幾對耳環。」

Joey 下次行東大門記得帶現金喇!

Joey 唔只Shopping 唔順利,就連搵食都有甩漏,爭啲搞到大家冇飯開,「噚日做完嘢之後,我同阿Y諗住一人一日安排食晚餐。第一日佢安排,好好味,係一粒星嘅米芝蓮;第二日我發板,我好鬼死老定帶佢去我食開好好味嘅人蔘雞補吓啦,點不知去到嘅時候變咗個地盤喎!天氣又愈嚟愈凍,我哋做完成日嘢未食過嘢,諗住求其搵個地址食,又搵極都搵唔到喎,最後都係喺番阿Y之前俾我一堆餐廳嘅list入面搵咗一間,要成廿分鐘車程先去到嘅一間烤肉店,所以最後其實嗰間餐廳都係阿Y介紹嘅,哈哈。」

都係 Wyman 可靠啲!

+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。