【跳躍生命線】張彥博殉職戲吊威也 頸椎重創：四個月先好返
撰文：鄺鈺瑩
出版：更新：
張彥博為演雄姐於唐樓塌陷而殉職一幕，不僅整傷頸椎。（劇照）
何廣沛、張彥博同郭子豪於《跳躍生命線》經常都以串燒三兄弟姿態出場，之不過，睇到今晚「雄姐」張彥博於出勤時意外殉職，真係心都碎。
提到呢場死神來了嘅戲份，張彥博接受訪問時透露，當初先係拍廠景爆破部分，之後再以實景拍攝飛落街部分，差不多用了三日時間才完成。「最大挑戰係要吊威也，雖然埋位前試咗好多次，但意外嘅嘢真係無得預。」原來張彥博在飛落街時，不慎chok到頸椎，他起初不以為意，仲繼續開工，直到有日瞓醒右手無晒感覺才驚覺出事。「我開頭以為係壓著手瞓，所以麻痹，點知第二日瞓醒右腳無晒感覺，嗱嗱聲去睇醫生，原來成條頸椎歪咗，做咗好多物理治療、唞咗不多四個月先好返。」張彥博所指嘅「唞」，其實一樣係照開工，只係盡量唔做太傷身嘅工作。「因為拍完呢場戲，先剪頭髮拍學堂操嘅戲份，所以你諗到有幾甘，為咗唔想再受傷，所以依家係咁做gym，希望有啲肌肉保護吓。」
《跳》每集尾聲都會有幾位主角嘅旁白，不過雄姐殉職後嗰集，張彥博就以歌聲令到成件事更煽情，佢仲話自己睇返都想喊。
頸椎受傷真係可大可小，不過睇返「雄姐」殉職嗰幕，真係為之動容。提到「雄姐」深受觀眾歡迎，張彥博話都有留意網民留言，感覺既開心又感動。「喺TVB無論大小角色都盡力去做，今次係一個好好嘅學習同進步，說實在，雄姐唔係咁易做，要拿捏得好好，有啲對白如果語氣用得唔啱，隨時熄電視。」張彥博透露當初他為了「雄姐」更連腳毛都脫埋，可惜該場沙灘戲份最終刪走一大半，令其光滑美腿無緣曝光⋯⋯張彥博指《跳躍》播出後，除了達成了他今年有劇去繼承的願望之外，另一邊廂，其工作量亦愈來愈多，明年的工作計劃他亦已度好了。「明年初係會第一次返內地拍網劇，做男二，有得賺錢緊係盡力賺啦。」
張彥博話跳躍F4個MV ，係佢同何廣沛等人做Gym時忽發其想諗出來。「大家都無包袱，最驚係無人睇。」MV上載一星期不到已有40多萬觀看次數，直頭可以出道啦⋯⋯（資料圖片）
雄姐最感人一幕逐格睇
+46
+7