【樓奴】Ansheles拍《迷失假期》非為錢 戰鬥民族要挑戰香港樓市

撰文:鄺鈺瑩
出版:更新:

香港樓價高企,想要安居樂業真係唔係話咁易。之不過,擁有戰鬥民族血統嘅Ansheles 來港讀書並成為藝人之後,完全未有被呢個石屎森林嚇怕,除高呼「我好愛呢個地方」外,更有意在港置業:「因為可以喺香港買樓,先真係成功。」

訪問時,駱振偉話自己都係新人,所以唔係好敢教路,但瞬即被Ansheles踢爆:「你平時唔係咁……(下刪五百字)」夾在中間的Asha苦笑表示:「佢哋就係咁。」(梁碧玲攝)

ViuTV劇集《迷失假期》以英國少女來港尋親為背景,由她入住的蝸囊旅館帶出不同住客的故事。雖說劇集乃小品之作,但起用的演員,除了入行多年的駱振偉外,如「俄仔」Ansheles 、Asha Cuthbert 、陳振華等皆為「白紙」一張,頗為大膽,再加上劇集不時以畫面、音樂、動作交代情節發展,香港觀眾或者需要少少時間才會看得明。於劇中飾演導遊兼打雜嘅駱振偉就話:「拍攝時只係覺得節奏無其他劇講得咁白,但作為演員我都幾享受,因為你唔會永遠都想用對白交代故事,今次學到好多嘢。」

Asha因為唔想面對香港傳媒,所以兩年前遠走英國打工,相信連佢自己都估唔到如今又再喺香港接受香港傳媒訪問。(梁碧玲攝)

機會可一不可再

身為新丁,Ansheles同Asha話收到劇集劇本時,便毫不猶豫答應演出,Ansheles解釋係因為同編劇傾過之後,有感這個角色存有自己嘅影子,認為可以挑戰一下,拍完之後,更認為自己可以在劇集有更多發展。

至於Asha接拍的原因仲簡單,「之前Modeling想食個包都冇份,今次機會實在太難得,想做到最好。」土生土長的英菲混血兒Asha,曾擔任模特兒,兩年前與同性伴侶移居英國,在當地做辦公室助理,唯後來發生情變,在人生最黑暗的時候,她收到了《迷失假期》的劇本,如曙光一樣把她帶回了香港。「拍劇時自己仲有好多問題未解決,佢哋畀咗好多提議。去英國之前因為做Model開始賺到錢,搞到成日都諗接job是否應該要以錢為先,自己都未諗清想點行條路時,變得好亂、好負面亦都好灰。」

「之前住炮台山,個租金OK,地點都好好,但同外國朋友講幾錢租時,佢哋覺得我係痴線。」(梁碧玲攝)

俄仔婆婆見孫仔住蝸居即喊

同樣都係靠做model發圍的Ansheles是否也有同感?「做嘢唔係為錢,而係因為我喜歡工作,我剛到香港時Complete Zero,冇朋友、冇工作真係乜都無,但而家搵到食之餘甚至可以幫到屋企人,愈賺得多係代表我真係有努力,我遇到挑戰唔會話放棄或者沮喪,而係諗如果克服到就好叻。」18歲來港讀書,由一粒中文都唔識到今時今日可以用流利中文做訪問,俄仔Ansheles又真係叻。提到劇中的蝸囊旅館如劏房一樣,Ansheles話身在俄羅斯的婆婆曾因見到新聞中的劏房而受驚,喊住咁打比佢。「佢睇到新聞,喊住打嚟問我係咪住喺咁嘅地方,仲叫我有困難唔怕講,可以幫手。媽咪來香港時,見到我屋企有少少發毛、出面又有老鼠,覺得我好似好慘咁。」

估唔到俄仔竟然會想喺香港買樓……(梁碧玲攝)

俄仔買樓論:想試下自己有幾叻

雖然深知喺香港連租樓都難,但Ansheles就逆線而行。「我係好想買樓,我成日都覺得如果喺香港能夠一個人生活得到,去到邊都可以,香港生活真係好難,但我想試下自己有幾叻,所以想買樓,咁先真係成功!」他解釋是因為小時候在俄羅斯成日都要搬屋,後來更到歐洲工作。直到來港後,他從「住耐啲」的念頭萌起「買樓」的打算,駱振偉在旁聽到Ansheles一直說「我好愛香港」,也忍不住指他是個真正的「戰爭民族」,因為自己就從未諗過做樓奴。

駱振偉就話寧願租樓都唔想做一世樓奴。(梁碧玲攝)

駱振偉中六合彩都不買樓:唔想冇自由

「我係好反對,成日都聽到香港唔夠地方住,但買樓/出租不停發生,為嘅就係賺錢,成個社會都係咁嘅時候,就睇下邊個有樓喺手、唔使捱,而錢就變為最大Power,好多國家都只限市民擁有一個物業或以政策去限制租金,但香港係好鼓勵人去買樓,導致樓價咁高,買樓係咪就過到人世呢?」 駱振偉更指就算中六合彩都唔會用作買樓,而他亦曾見過身邊好友為了供樓而冇晒自由。「如果要犧牲咁多嘢先得到層樓,值得咩?」係唔值,但「買樓」似乎已成了香港人的心魔,唔少情侶都認為有樓先有幸福,不過Asha就唔係咁睇,「結婚有間屋,咁你婚姻係未就可以完美?唔保證架喎。」對她來說,另一半願意同甘共苦、一齊捱快餐才是更重要。

Ansheles、Asha同駱振偉都話其實開拍幾日都唔知做緊乜,直到邵子風報到才有了引領。
面對余安安,駱振偉話雖然緊張到不得了,但最後都係忍唔住向對方請教。「佢話感受到我投入、有heart,對我來說已經係一個好大鼓勵。」

場地提供: Lazy Boss

駱振偉服裝: SCOTCH & SODA

駱振偉Stylist: Lilian

Ansheles Makeup & Hairstyling: Becky Kwan

+7