張衛健經典作品點止《西遊記》 有角色竟同「小便」有關?

撰文:
最後更新日期:

拍完《西遊記》後,張衛健因為續集片酬而與TVB大割蓆,原因係當時有高層指佢如果塊面無馬騮毛的話,根本唔值錢。(劇照)

《大帥哥》都未播出,主角張衛健就已經有份角逐「最佳男主角」,可見大台重視程度。張衛健雖然已經有近22年沒有拍TVB劇,但佢早年嘅作品至今仍然令唔少觀眾津津樂道。要講經典,《西遊記》一定係首位,當年首集已創下44點收視紀錄,從而被譽爲改編作品中的經典,口頭禪「Yo!使乜驚呀!」、「我係花果山水簾洞美猴皇齊天大聖孫悟空!」亦相信只有張衛健先能夠演繹出神髓。而《西遊記》作為藍本而改編嘅《齊天大聖孫悟空》,亦可以話係張衛健代表作,再加上當時有謝霆鋒、Twins、梁漢文、葛民輝等人演出,陣容強勁,「噼啪你個隆的咚啊!」、「型到跌渣!」亦成了當年嘅潮語之一。

雖然《我愛牙擦蘇》裏面張衛健有林漪娸呢位大婆,但佢就鍾情於黎姿同劉小慧。(電視畫面)

除咗馬騮仔之外,大家又記唔記得《哎吔哎吔親親你》呢首主題曲呢?92年嘅《我愛牙擦蘇》,張衛健飾演嘅牙擦蘇,同黎姿以及劉小慧發展出一段糾纏不清嘅三角戀,而除此之外,佢喺劇中仲同有林漪娸呢位童養媳,享盡齊人之福。

《老友鬼鬼》當年已經有簡陋CG,只要溫兆倫小便,張衛健呢隻鬼就會竄出嚟。(電視畫面)

91年同溫兆倫合作嘅《老友鬼鬼》,張衛健於劇中飾演爛賭交通輔警,為幫梁佩玲擺脫男友被陷害至死,死後因腎臟移植到溫兆倫身上,之後每次只要溫兆倫小便,張衛健就會出現。以題材嚟講,《老友鬼鬼》喺當年都算新鮮,而張衛健於劇中嘅口頭禪「咪當我Robert」、「我哋係醒字派嚟㗎嘛」相信大家都好有印象。

當年女神雲集的《小寶與康熙》,舒淇喺劇飾演韋小寶嘅初戀情人,可惜佢等唔到小寶就死咗。(網上圖片)

另外,唔知大家仲唔記得「涼風有信,秋月無邊。虧我思嬌嘅情緒,好比度日如年。我雖則唔係玉樹臨風,瀟灑倜儻,但我有廣闊嘅胸襟加強勁嘅臂彎。」呢句金句呢?01年無綫外購嘅《小寶與康熙》,張衛健飾演韋小寶,既煽情又肉麻,周旋於林心如、陳法蓉、朱茵、張茜等人之間,而同劇仲有舒淇同鄭伊健。
 

恬妞只係比張衛健大七歲,但就要演佢媽媽苗翠花,加上張衛健節奏太快,令佢開工第一日就已經想走人。(電視畫面)

除大台劇之外,張衛健早前有唔少劇集都曾在亞視播出(外購劇),99年佢同恬妞主演嘅《少年英雄方世玉》為亞視取得最高26點收視,比《還珠格格》更勝一籌,「兩母子」一唱一和如同活寶貝一樣。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。