【專訪】張敬軒一打hashtag即變mean精:好睇過冠冕堂皇嘅說話!

撰文:
最後更新日期:

有咩驅使張敬軒出唱片之餘仲要拍網片?係愛定係責任呢?

「係窮呀!恭喜發財!」

訪問時間有限,軒仔一句神回應劃破大家繃緊的感覺,記者、工作人員,甚至他本人也忍俊不禁。

身兼歌手和社交平台達人,無論認真MV或是惡搞遊記,統統贏盡「正皮」,歌曲《缺》MV更榮登「YouTube 香港 2018 年度十大熱門廣東歌」榜首。到底要在網絡江湖中生存有甚麼法則?豈料軒仔突然「跳tone」,一本正經地說:「如果大家想喺網絡世界生存,你要知道hashtag係乜嘢!」

張敬軒玩Social Media咁叻真係有原因,一句「係窮呀!」你就知佢係老江湖啦!(葉志明攝)

玩Hashtag平衡陰暗面 潛台詞精彩過正文

張敬軒簡直是「Hashtag之鬼」,每次發文總會加上一連串Hashtag,有時更會「Mean精」上身幽你一默。「Hashtag只不過係潛台詞,可以打一啲心入面陰暗面。某程度上係一種精神分裂,你同我都會有。」最簡單例子,即使心情不佳,但面對同事、上司你亦要表現友善,有多少不滿也只能唱句《講不出聲》。「Hashtag好睇過啲冠冕堂皇嘅說話,同埋我覺得佢係免責嘅,真係㗎!因為同一個hashtag唔只係我用㗎嘛!」

軒仔亦點出網絡世界一個值得玩味的地方──自定義,如何演繹由你話事。他記得最近一位演藝界前輩發文寫上「#WTF」,大家也感錯愕,但原意卻是「Welcome To 乜乜乜」。正因為網絡世界容許這種錯摸,比傳統媒體自由,讓他能最大程度地忠於自己,放下公眾人物的包袱。

個個都玩hashtag,唔通個個都玩hashtag咩?軒仔就係透過hashtag將自己陰暗面寫出嚟,所以佢覺得網絡令佢可以最大程度咁忠於自己。(葉志明攝)

人與人溝通太麻煩 開Live安撫寂寞的心

「有咩Whatsapp傾⋯⋯」這是今時今日大家的口頭禪,公事、心事,甚至情話也透過通訊軟件傳達,明明渴望有人陪伴,卻抗拒真人陪伴。「因為人同人之間嘅溝通太麻煩,好多嘢要顧及,網上嘅陪伴方便好多。」所以軒仔有時選擇凌晨時分開直播,觀察這個城市有多少人與自己一樣寂寞,需要陪伴。「呢種陪伴係好深入,好精神上嘅交流。我可以最大程度講一啲自己嘅諗法,關於生死、生活;甚至遇到唔好嘅處境,可以為自己澄清。」他續說:「你問我係咪完全冇宣傳考慮呢?唔係嘅,如果係嘅我就素顏啦,係咪先!不過心態好緊要,喺爭取關注嘅同時,唔好刻意去經營,要真心咁去做。」

有時玩social media唔係盲目經營就得,係要靠真心。雖然呢句好似《食神》嘅對白,不過又真喎,你見軒仔開Live隔空陪大家就知啦!(葉志明攝)

MV留言板變「情人橋」 讓網民表心跡「做功德」

網絡不單讓大家隔空陪伴,也是網民情緒的出口,「千字文」留言屢見不鮮,作為公眾人物也要有智慧去應付。「如果你(網民)打完一堆我都唔知你鬧緊我乜嘅Comment,你會好過啲嘅,咁都係我嘅功德嚟㗎喎,亦都係呢個平台存在嘅價值。」除了批評,也有窩心的一面,《只是太愛你》的留言部份讓軒仔最為感動:「《只是太愛你》MV下面嘅留言,好似係告解牌咁,網民將自己過去一段好遺憾嘅感情,或者要表白嘅說話寫晒出嚟,好似情人橋鎖上『連心鎖』一樣,係精神層面意義,佢亦細水長流咁慢慢傳播開去。」

你有冇喺《只是太愛你》留言呢?就算冇,睇完啲留言你就明軒仔點解咁感動。

「我唔會再唱《潛水》嘅Live,首歌唔係人唱㗎!」

軒仔今年音樂上非常多產,有四首派台歌:《缺》、《天才兒童1985》、《潛水》及《百年樹木》,在電台播放均有好成績。但論MV點擊率,《潛水》在數字上相對最低,是否代表大眾還未能接納「非典型」廣東歌的風格?軒仔說:「我覺得唔可以輸打贏要,唔可以有一種自己係網民上帝嘅感覺,唔係你Post咩人哋都要受。」他續說:「雖然《潛水》view數係相當最低嘅一首,但係佢係我音樂上好新嘅嘗試,因為我未試過咁嘅曲風。舉個例,基因再好,再靚嘅夫婦,生十個小朋友,點都有一個個樣冇咁靚啩?但佢可能係最有天賦,父母最錫都未定呢!」

正當我還在想:「所言甚是……」軒仔再次「跳tone」:「我今日喺到宣布,我唔會再唱《潛水》呢首歌嘅Live㗎喇!唉……每一次唱呢首歌都好似斷送緊我嘅歌唱生涯咁!因為作曲嗰個係冇諗過唱Live㗎!冇諗過唱嗰個嘅感受,林家謙(作曲人)自己唱都係『抆抆地』!」絕對有理由相信,那句「恭喜發財」,以及連串玩嘢Hashtag全都發自他真心,贏得網民關注的確有原因。

軒仔宣布唔會再唱《潛水》嘅Live,有幸聽過嘅樂迷要好好珍惜喇!(葉志明攝)

《缺》MV榮登「YouTube 香港 2018 年度十大熱門廣東歌」榜首


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。