【仙后餐廳】張敬軒教你聽真《缺》搵「彩蛋」 前奏向林憶蓮致敬

撰文:
最後更新日期:

聽歌人人都會,無論返工返學、搭車行路,好多人都會戴耳機塞住對耳。不過,除咗最突出嘅人聲部份外,到底點先可以全面地聽一首歌呢?今時今日大家睇戲都鍾意睇「彩蛋」,務求捕捉每一個細節位;套用落歌曲上,點先聽得出當中嘅「彩蛋」呢?張敬軒就用新歌《缺》做例子話俾大家聽!

攝影:陳順禎

張敬軒早前推出新歌《缺》,邀請到殿堂級音樂人Mac Chew(周國儀)操刀編曲部份。《缺》前奏以鋼琴和弦樂揭開序幕,疏落的鋼琴旋律營造一種孤寂的感覺,張敬軒以呢喃的聲線處理Verse的部份,原來是為營造一個冰天雪地的氣氛,軒仔解釋:「其實一首歌嘅編曲好重要,首先佢奠定咗旋律嘅基調。《缺》入面Mac Chew用一個Minor(小調)和弦開始,前奏一起到我開口嘅第一句,已經有一個冰天雪地嘅氣氛。」難怪《缺》的MV要有下雪的場景,利用影像讓大家更明白歌曲意思。

人人都會聽歌,但係你又識唔識聽「編曲」呢?(陳順禎攝)

軒仔之前接受訪問已經講過,新專輯會以向90年代致敬作主題;加上他對林憶蓮1996年專輯《感覺完美》情有獨鍾,所以才特意邀請Mac Chew出山,採用已塵封多年的Sampler(取樣器),去呈現一個90年代感覺的編曲。原來《缺》一曲的前奏已包含一個向90年代致敬的「彩蛋」,軒仔介紹:「林憶蓮於96年嘅一首主打歌《哭》,前奏所用嘅電鋼琴音色,同《缺》入面所用嘅電鋼琴係一樣,呢個係致敬嘅一種方法。」

軒仔今次邀請到著名音樂人Mac Chew負責《缺》的編曲。(陳順禎攝)

+4
+3
+2

《缺》當中另一個「彩蛋」就是軒仔的高音部份,他表示近年改變了錄音習慣,而且音高亦有所突破。軒仔表示:「另外一個『彩蛋』就係副歌部份嘅高音,呢幾年我都好少唱一啲好澎湃嘅高音。呢首歌最高音嘅地方一直係B flat同High C徘徊,都錄咗我一段時間。」

軒仔續說:「其實我呢幾年錄音習慣有啲改變,以前係唱一take又者幾take,揀比較好嘅一take,邊句唔好就補嗰句。但係近幾年開始,我着重Live嘅感覺,今次頭尾我錄咗三十幾take,呢個係第七個session最後一take。我覺得相對係感情、音色都比較充沛。」

軒仔表示近年比較少唱澎湃的高音,所以今次《缺》要錄三十多take才能完成。

要完整地理解一首歌,除了以樂理的角度出發,分析編曲,理解當中的和弦、樂器鋪排等等細節外,還可以了解歌手與音樂人錄音的過程及創作的靈感。軒仔之前接受訪問提過,在音樂事業上他已圓夢,令他一直堅持是因為一份使命感。軒仔覺得身為歌手就像一療癒師,希望能夠創作為聽眾療傷的歌曲。他形容《缺》一曲蘊含的力量比較強大,希望聽眾能夠到低谷找回自己;利用那些「缺口」轉化為「出口」,能夠重新站起來。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。