【大帥哥】演技升呢有代價　蔡思貝耳鳴半年洪永城整傷眼

無綫劇集《大帥哥》播出短短5日便大獲好評，同翡翠台同步播放的內地Youku網播放量也已接近8千萬，受歡迎程度可見一斑。今日（8日）主演張衛健（Dicky）、洪永城（Tony）、蔡思貝（Sisley）等齊齊亮相活動為劇集造勢。見到該劇有咁大迴響，Tony同Sisley也很開心同感恩。

劇集受歡迎之餘，Tony同Sisley的演技也「更上一層樓」，獲觀眾大讚有進步，這當然同他們私底下努力密不可分，Sisley說：「對白上我有下功夫，睇嗰啲gestures，即係走位嗰樣嘢，喺姿態動作，我都會下多啲功夫，希望盡量融入多啲嗰個年代嘅感覺。（具體做咗啲咩？）我會參考好多民初劇，或者喺對白上面講嘅時候我會諗返如果喺嗰個年代講，同現代講嘅對白，節奏上、用嘅詞語上，可能都會tune返啱咁樣。」除此之外，Sisley表示Dicky也在分析劇本方面教了她不少東西：「佢好清楚知道每一個位，觀眾想睇啲咩，呢度你要表演啲咩出嚟畀公眾去接受，從而就可以幫到你自己嘅角色，去話畀人聽你係一個點樣嘅人，半年的拍攝時間，真係喺戲劇上面學咗好多嘢。」

而Tony除了閱讀大量書籍了解當時的生活背景、環境之外，在打戲方面也花了幾個月時間練習，他還透露最初開始拍攝時大家隻眼都不太順利：「一開始曹永廉好似有眼瘡，要做手術，跟住爆破啲碎片入咗徐榮隻眼度，我都係槍戰時啲碎片入咗眼度，阿貝就被撞到眼球。」其實Sisley的耳仔也因反應彈受傷，她更當場痛到喊，耳仔嗡了半年。

之前Tony參演的《張保仔》被指演技浮誇，不知道今次的《大帥哥》是否可以視作他的翻身之作呢？「我唔知點形容呢，總之多謝觀眾支持我嘅戲啦，陸續都會有。（覺得比之前好好多？）當然啦，有進步的，我自己睇到，亦都因為各位同事都配合得好好，劇本都好好，導演都好好，所以先有個好好的製成品出嚟。」