綠葉王楊證樺三年抱兩再添丁 為太太沈可欣煲湯準備薑水坐月
撰文：洪曉璇
出版：更新：
生仔要面對十級痛楚，好似去鬼門關走一轉再返嚟一樣，每位男士陪過老婆入產房，都會受一次震撼教育，以後對老婆更好。楊證樺沈可欣2015年結婚，育有一子，呢日阿Man喺Facebook分享喜訊，細仔喺12月10號已經出世啦﹗佢接受《香港01》訪問時表示：「生產過程兩公婆都好緊張，好在母子平安﹗」
楊證樺沈可欣選擇喺公立醫院生BB，特別出POST鳴謝醫護人員幫助。（楊證樺FB）
雖然阿Man同沈可欣已經唔係第一次做父母，但再次迎接小生命嘅降臨都難免緊張。沈可欣預產期係今個月15號，呢個星期阿Man已經進入戒備狀態：「10號朝早老婆突然話肚痛就去醫院，到夜晚8點幾先入產房，今次生嘅過程快過大仔，但陣痛時間長好多，自己都有全程陪產同親手剪臍帶。」
細仔出世超過7磅，睇相見到塊面圓碌碌相當精靈。（楊證樺FB）
呢張係大仔出世時嘅合照，大家覺得兩兄弟似唔似樣？（楊證樺FB）
細仔出世有成3.27KG，以沈可欣身型嚟講算係大碼BB，順產時都真係會比較辛苦，阿Man憶述喺產房嘅情況都猶有餘悸：「見到太太咁辛苦又開心又緊張，唔捨得佢咁痛，未試過老婆可以鍊到隻手咁大力，仲大力個男人，老婆聞笑氣止痛本身都已經暈暈下，但一陣痛就癲咗咁捉住我隻手。」
楊證樺話細仔仲未改名，不過已經有心水會再諗多一陣先，所以暫時唔公布住。（楊證樺FB）
電話訪問時，阿Man正係趁兩段探病時間中間空檔，趕返屋企為老婆煲湯以及準備薑水，雖然忙碌但忙得相當幸福：「之前買定幾份禮物話細佬送俾哥哥，做定心理建設，大仔都好期待細佬可以快啲返屋企。（仲會唔會追多個女？）唔……其實好肉痛老婆咁辛苦，生嗰一刻真係咩都幫唔到佢，所以自己諗都係算啦應該唔再追，兩個夠晒數。」
阿Man話不便俾大仔到醫院探望媽媽同細佬，不過大仔對細佬出世相當期待，應該唔會有呷醋情況出現。（楊證樺FB）
【1+1的深情】楊證樺沈可欣樂做甘草夫妻 補求婚令太太感動爆喊
至於有咩可以送俾太太獎勵下佢咁辛苦？阿Man就即刻轉情深mode話：「物質上嘅禮物幾時都有，時間同陪伴先係最緊要，會加倍三倍咁疼錫佢希望嚟緊可以多啲工作機會，多啲監製導演搵我做嘢，搵多啲錢全部俾晒老婆，俾最好嘅生活俾老婆。」公司高層們快啲搵楊爸爸做嘢啦﹗
一個男人願意將所有時間心機金錢都文晒出嚟，沈可欣真係再痛都值得啦。（影片截圖）