鄭希怡帶囡囡梁浸浸現身警署 容祖兒關智斌助出重酬尋失物

撰文:洪曉璇
出版:更新:

鄭希怡嘅囡囡梁浸浸,天生曲髮相當可愛,自出世起已經風靡唔少星級UNCLE AUNTIE,容祖兒謝霆鋒TWINS等錫到佢燶,媽媽YUMIKO都樂於帶住個女周圍去周圍玩。點知呢日兩母女忽然去到警署,又唔係學校去參觀,到底咩事呢?

Yumiko經常帶住囡囡周圍去。(鄭希怡IG)
梁浸浸自細都相當有性格,呢排愛上煮飯仔,但整完PIZZA係唔會食嘅。(梁浸浸IG)

時間線要推返去5日前,大家都知容祖兒出名大頭蝦,電話銀包跌過無數次,原來Yumiko都不遑多讓,佢喺IG上載一個桃紅色銀包相片,留言話:「遺失銀包一個,有人執到嗎?可以要返d卡嗎?無限感激。」網友紛紛留言問線索,但Yumiko對自己幾時邊度遺失都毫無頭緒,網友不禁笑問:「究竟有無拎出街?不如問下浸浸姐先。」關智斌容祖兒都出力呼籲,Kenny話出一千蚊重酬,Joey居然話送出「謝霆鋒豬扒包一個」相當有創意。

大家都好熱心幫YUMIKO搵銀包,奈何當事人咩線索都俾唔到……(鄭希怡IG)
關智斌容祖兒仲幫手出重酬尋失物﹗(鄭希怡IG)

大家可能諗,唔見咗呢個名牌銀包,搵到機會都應該好微啦,但Yumiko就帶來好消息:「奇蹟出現了!收到銀行電話,遺失的已在警署,多謝好心人。萬分感謝,想多謝個好心人,警察說那是不能說的秘密。獎金不知如何比你,因為關智斌話會重酬你,容祖兒會請你食謝霆鋒豬扒包,就係成日都賣曬嗰個包。」Yumiko仲笑言搵返銀包都不及梁浸浸開心:「亞浸都好開心,終於有得去police station,佢話呢度係警察的屋企,係咪有床架,夜晚係咪一齊訓係度,下刪100個問題……」

搵到銀包當然開心,但YUMIKO笑言囡囡有得去警署仲興奮。(鄭希怡IG)
+3