陳嘉寶B女趕得切狗年尾班車出世 改名Hosanna有稱頌之意

撰文:
最後更新日期:

仲有幾日就到豬年啦,立春前出世都仲係狗年BB。陳嘉寶(Anjaylia)2017年同拍拖4年嘅初戀對象黃頌祈(Epaphras)結婚,18年9月宣布懷孕,呢日佢就喺IG宣布女兒已經出世喇,趕到尾班車做狗年BB,新年可以逗利是!

Anjaylia去年9月宣布有孕後,身型都無咩大變化,仲不時同老公周圍去散散心。(Anjaylia IG)

陳嘉寶宣布有喜已懷孕6個月 陳凱琳蔡穎恩爭做契媽

Anjaylia喺IG上載一張BB女瞓喺粉紅色BB床嘅相片,身上冚住一張熊仔頭粉紅色小被,上面繡上「Hosanna」正正係黃家大小姐嘅名,來自希伯來文嘅基督教用語,有稱頌歡呼嘅正面意思。Anjaylia只公開Hosanna下半邊面,見到佢面圓圓咀細細,右手握拳非常可愛呀﹗

Anjaylia上載粉紅色調靚相,宣布女兒已經出世啦﹗(Anjaylia IG)

要照顧初生BB真係花好多時間,Anjaylia就用B女第一身留言同大家問好:「大家好,Hosanna正式同大家見面啦!感謝大家嘅祝福及關心,我好健康呀但仲有啲怕醜同面紅,所以請俾啲時間我去適應、慢慢探索呢個充滿奇蹟及偉大嘅世界。Anjay同Epa正忙住照顧我,如果無時間回覆大家Message請多多體諒。感激大家所有嘅愛及祝福,願上帝與你同在!」

呢對新手父母正忙於照顧Hosanna,未得閒覆訊息大家請見諒呀﹗(Anjaylia IG)

唔知好姐妹陳凱琳同賴慰玲幾時去探下小Hosanna呢?(Anjaylia IG)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。