【你咪理,我愛你】王祖藍惡搞經典海報 《屍殺落車》係咩玩法?

撰文:
最後更新日期:

王祖藍處男執導嘅《你咪理,我愛你!》碌咗人情咭請嚟「星閃閃陣容」,大家睇星睇戲之餘,又有無發現戲中有位人兄老是常出現,呢個彩蛋其實都幾有心思。

王祖藍為新戲一腳踢,導演、幕後、路人咩都做晒。

惡搞電影海報

方力申同王菀睇戲一幕,大家有無發現戲院外嘅海報有少少怪?係呀,因為每一張海報主角都係王祖藍!!!瘋狂惡搞經典電影《葉問》、《屍殺列車》、《八仙飯店》、《閃靈》、《沉默的羔羊》同《驅魔人》等,除咗惡搞出嚟啲戲名夠晒爆笑之外,對製作要求認真嘅祖藍,仲每張相都跟足原著,無論造型、神緒、動作、色tone都係一絲不苟,出嚟效果相檔爆笑。而佢一手捧紅嘅臨時演員阿夢,亦有助陣拍攝惡搞海報。

方力申同王菀身後嘅海報,只要細心又認真睇,應該會好不安。

為咗呢啲海報,王祖藍用咗大半日時間去影架。

點解要咁做呢?祖藍接受訪問時表示:「因為我哋一直都為咗電影海報嘅版權而煩惱,冇理由一間電影院度係完全唔見海報架嘛,但如果用正版海報,又有版權問題。然後我哋絞盡腦汁之際,有同事話不如玩惡搞啦,我哋覺得呢個提議好好,咪惡搞咯。你哋咪以為我哋hea住惡搞,每張海報,就算好細嘅字都係用心度,有啲同事睇完都笑到肚痛。為咗呢批海報,我同夢足足用咗大半日時間去拍,所以到拍完,我哋都珍藏喺公司唔捨得唔要。」

臭都無所謂

《單身監獄》嗰場嘅主角雖然係梁嘉琪、阮兆祥、羅蘭、苟芸慧同湯駿業,但全場最搶嘅竟然係王祖藍。佢雖然喺呢個場口係「快閃黨」,但因為佢個造型相當頹,一頭亂髮之餘,仲要加埋趣緻嘅表情同埋「造手」,真係見一次笑一次。不過原來呢場戲係無心插柳柳成蔭,事緣「祖藍」原本冇安排自己現身,但因為拍攝時出現阻滯,令到相關場口delay咗足足大半日才能正式埋位開工,而準時到場準備飾演「精神病患者」嘅臨演亦因為「夠鐘收工」而未能如期演出。結果在冇得揀嘅情況下,祖藍決定親身上陣,豈料出來效果相當爆笑,獲剪接師加重戲份。據知,原本有另一名工作人員跟祖藍並肩上陣,但因為該件戲服經過一日汗水洗禮後傳出異味,同事最後拒做「臭的替身」,令祖藍最後孤身上陣。為咗場戲,連臭味都頂得住,祖藍真係犀利。

聞說呢件戲服盡吸汗味,臭到無人肯著上身,但身為導演嘅王祖藍好似好享受咁……

倒後鏡裏的男人

好喇,考眼力指數愈嚟愈犀利喇,呢個場口嘅祖藍已經相當難發現喇。佢到底喺邊度出現呢?就係架車嘅倒後鏡入面喇,係咪估你唔到呢?點解會咁呢?事緣有同事覺得架車嘅倒後鏡冇人好似相當古怪咁,跟住導演就自告奮勇,一支箭標上紅館度扮講電話;據知為咗令個倒影可以好準確咁投射喺倒後鏡度,祖藍淨係同工作人員對位都搞咗好耐,無聊得嚟夠晒心思。

後製時,工作人員本身以為紅圈呢位人兄係唔小心入鏡,仲打算「執」走,細問下才發現係王祖藍本人。

後尾枕都唔放過

最考眼力嘅時刻來臨了,到底呢一格個王祖藍喺邊度?竟然係喺後面健緊身,你認唔到佢件「招牌白底衫」,都認到佢個頭箍look喇嘛。咁樣都要「搶鏡」,呢位導演真係好鬼naughty。

呢個頭箍仿似已同王祖藍融為一體,見箍如見人。

打雜都撈埋

去到最後,就算你幾好眼力,都唔會知道王祖藍喺邊度出現,唔係睇小你哋,係因為呢part嘅祖藍係喺鏡頭後出現,應該要有天眼通嘅朋友先可以見到佢。話說呢場「掟食物」戲需要工作人員掟嘢,但因為各人都有自己嘅嘢忙,所以導演決定撈埋打雜,喺鏡頭後面出力係咁掟阿凌文龍同湯怡,真係笑死人。唔知啲演員,見到導演喺度猛咁掟包時,佢哋心入面又諗緊啲乜嘅呢?

拍戲budget有限,導演唯有身兼多職,辛苦晒。

+8
+7
+6

【周五心意運動】您捐一封$50利是,已可為基層送上溫飽,01心意呼籲您支持【食德好】,每$50可為12個家庭提供一餐回收蔬果及食物https://heart.hk01.com/zh/project/10003
 



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。