【荷里活有個大老千】司徒暉入行10年想放棄:好多個月冇工開

撰文:
最後更新日期:

TVB新劇《荷里活有個大老千》以60年代嘅香港為背景,當時賭博風行,也是香港最黑暗的時期,貪腐成風。劇中由湯鎮業飾演的文探長在警界隻手遮天,他的手下也跟着他到處耀武揚威,當中飾演榮少的司徒暉(Louis),作為湯哥的得力助手,更處處為難鄭則仕。雖然角色並不討好,但就令觀眾注意到這個默默耕耘的演員。

司徒暉在劇中飾演文探長(湯鎮業飾)的手下,處處刁難龍四(鄭則仕飾)。(劇照)

湯哥飾演的文探長有權有勢,Louis跟着湯哥這個大佬「搵食」,自然與對方有大量的對手戲,更因為時時跟出跟入,有更多機會向前輩學習,Louis在接受《香港01》訪問時也表示很感謝湯哥:「佢真係好關照我,多得佢畀位我上。有場戲係講龍四設局用架車炸我同湯哥,導演就要求我哋個人向後135度跳起再跌落塌塌米,結果我唔識跳,要湯哥老人家陪我趴街7、8次,但佢都冇怪我。」兩人不止在劇中合作無間,事後湯哥亦處處提攜Louis:「佢真係當我契仔咁,套劇完咗之後佢仲會介紹我畀監製識,邊度有啲咁好嘅前輩呀。」

Louis表示很感激湯哥支持,無論劇裏劇外都提攜他。(微博圖片)

Louis入行前曾做過救生員和游泳教練,之後參加第24期無綫電視藝員訓練班成為藝員。不知不覺入行近十年,他透露最初曾經月薪只有5000蚊,但他依然不放過任何一個角色,直至到2011年爆發臨時演員工潮,Louis試過連續4日做不停:「係咁開工係辛苦,不過人工幾個月岀幾萬蚊糧係辛苦都值,最高單月岀三萬五。」不過好景不長,Louis工作逐漸減少,收入不穩定,更受到家人的質疑:「其實屋企人一直都好反對我做呢行,因為覺得我30歲每個月都只係得一萬多啲唔掂,我老豆做個普通花王都搵兩萬蚊。而且我老豆已經68歲,我嘅任性都應該有個限度。」

Louis這次的角色有很大發揮空間,他也很感謝一眾前輩的指教。(影片截圖)

點擊下圖睇司徒暉更多精彩演出:

+4
+3
+2

這次遇到這個角色,演出備受好評,但Louis對前途仍然感到茫然:「做呢行就好似賭咁,你嘅賭注就係青春。無論你有冇背景有冇家底,結果係點冇人知。我今次咁好彩做咗呢套劇,就好似入到賭場中咗鋪大,但你唔知下一鋪會開咩。」今年將踏入30歲的Louis,也開始好好考慮未來的方向:「希望呢套劇個結果好,令到我可以同屋企人講繼續做呢行。但拍完《十八年後的終極告白》之後,我一路等等等,到而家都已經喺屋企坐咗好多個月。希望有啲好啲嘅角色,令屋企人唔駛擔心。」

Louis也有參與《多功能老婆》的演出。(微博圖片)

Louis入行至今仍然未得到家人的支持,更經常被媽媽的冷言冷語令他大受打擊:「可能因為佢做管工啦,乜都要管,日日都問我有冇工開,人工幾多,呢啲令到我好辛苦。」雖然如此,但Louis一路上就與一位好朋友互相扶持:「其實我同李偉健好Friend,嗰陣我哋都成日嗌窮,但估唔到佢因為Terry就彈起。所以呢啲其實好講求天時地利人和,多謝朋友嘅支持,希望屋企人都會支持我。」

Louis與李偉健在入行初期認識,一路以來互相扶持。(微博圖片)

+5
+4
+3


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。