【真情】鄭子誠憑「李子浩」開闢成奸之路:真係一個好好嘅基礎!

撰文:
最後更新日期:

TVB經典長篇溫馨倫理劇《真情》最近又重播,能夠再次重溫一眾花旦小生的精湛演技,定必勾起不少回憶。但講到最令觀眾深刻的角色,一定非由鄭子誠飾演的大奸角「李子浩」莫屬!鄭子誠首次拍劇就憑此角一炮而紅,更入圍當年台慶「最厭惡角色演繹大獎」,雖然最後被馬蹄露飾演的「May May」撃敗未能奪獎,但其奸角形象自此深入民心,更為日後奸角之路奠定基礎。

現年55歲以靚聲見稱的鄭子誠除了是大家的「音樂情人」,他因在經常在電視劇中經常飾演反派,並演得入目三分,被網民熱捧為「完美奸人」,奠定一代奸人地位。鄭子誠接受《香港01》訪問時亦承認其反派形象,全因《真情》中飾演「李子浩」這一角帶起,他稱:「因為我當年接咗李子浩之後,我接踵而嚟幾套角色都係奸,例如《烈火雄心》和《封神榜》,幾乎做緊嘅戲都係奸人嘅角色,所以真係一個好好嘅基礎,都全賴《真情》呢套非常之入屋嘅劇集。呢個奸人角色,啲人可以慢慢揣摩,睇住你點樣成奸之路,令到佢哋好恨之入骨,成全咗奸人嘅形象。」

李子浩為了錢財名利而拋棄石敏,追求歸拿督之女歸MayMay,因此經常被歸氏集團的同事稱為「軟飯駙馬」,其後李子浩得知歸MayMay並非歸拿督親生女後,拋棄歸MayMay之餘,更多次向歸家報復。(《真情》劇照)

對於拍檔馬蹄露日前自爆當年曾拒絕與他演親熱戲,鄭子誠就笑言不覺得可惜:「唔會,之前我係完成唔識佢,仲記得當年第一次同佢合作,合作咗冇耐就有呢場kiss戲,劇情話我追佢,送到佢返屋企門口就會有個kiss,當時大家都有啲擔憂,因為做呢啲親熱戲難過你演戲,二來大家唔係好熟就已經要kiss,嗰種芥蒂同尷尬都喺度,而且大家都係新演員就更加難演。而且馬蹄當年都有啲傲氣,唔係點睬人又成日咀藐藐,咁我又好驚會觸怒佢,當年我哋冇深情一吻,但都有少少鍚到,點到即止嘅。」

雖然當時對彼此印象一般,但鄭子誠和馬蹄露friend足幾廿年。(fb圖片)

問到當年拍攝的趣事,他就透露:「我記得角色去到尾聲嘅時候,未死之前有一幕講我挾持住楊婉儀同佢BB,正正就係我走出騎樓中槍嗰一幕之前,我見佢係自己嘅初戀情人,BB卻不是我嗰種嘅心酸同唏噓,同埋我同佢講我永遠唔會坐監,即係我情願走出去畀人射死都唔畀人拉,嗰種心裡面複雜嘅情緒係需要喊出嚟,但當年一個新演員係好難營造眼淚。當時就有人提議我揸啲萬金油落隻眼度,一定會出眼淚。結果我就係搽咗喺眼角下面,真係喊到呀,但連對眼擘唔大,因為萬金油嗰陣味係好「攻眼」又「攻鼻」,對眼直情紅晒,眼淚出到,但感覺出唔到,自己都有少少遺憾,效果唔係太靚,但當年都總算完成咗喊嘅呢場戲。」

估唔到誠哥當年都有用萬金油呢招。(資料圖片)

+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。