【開心速遞】Bonnie入屋有驚喜 脆香雞翼同芝蛋脆雞海報輪住出場

撰文:鄺鈺瑩
出版:更新:
根據通訊事務管理局嘅條例,植入式廣告需自然不突兀,Bonnie身後嘅海報又真係一啲都唔突兀喎……

《愛‧回家之開心速遞》深受觀眾歡迎,亦同樣深受廣告商嘅歡迎,而自從通訊事務管理局放寬電視節目有關間接宣傳的規管後,植入式廣告可以話喺劇中無處不在,就好似前兩日嘅廢青再培訓上下集,雖然大家嘅目光可能落咗喺譚道德(陳榮峻)同安仔(周嘉洛)之上,但其實譚家門外,亦同樣有笑點。

日日有唔同優惠,所以同一場景同一Bonnie,廣告都有少少唔同,高招!

話說當Bonnie(林凱恩飾)準備入屋之際,爸爸譚道德同佢講未搞掂安仔,叫Bonnie喺熊家住多兩日。就係Bonnie身處嘅走廊,竟然出現麥當奴超值選廣告!雖然係同一個Bonnie同一條走廊,但佢背後嘅廣告就分別出現過12蚊芝蛋脆雞包同10蚊脆香雞翼,唔細心睇真係難以發現麥當奴已融入家中。

近鏡時,麥當奴廣告消失咗,點解嘅?!