【逃犯條例】《早霸王》為香港點歌 森美感觸:未來要繼續向前行

撰文:
最後更新日期:

昨日大批香港市民為了反對香港特區政府將修訂《逃犯條例》,阻止立法會大會於當日恢復二讀辯論,發起了罷工和罷課的行動,並集結於金鐘政府總部外留守,最後警方終與示威者爆發了衝突,更演變成流血事件,多名示威者、記者以及警察均告受傷,一幕幕震撼的畫面,令到香港人看得好心痛。由森美與阮小儀等主持的商台節目《早霸王》,今日就作出了特別的安排,沒有往常的環節,改做「為香港點歌」來為香港加油打氣。

早霸王一班主持齊為香港打氣。(早霸王facebook圖片)

森美表示:「呢段時間相信好多香港人心入面都有好多唔同嘅疑問,當中各有自己嘅諗法,我哋幾位主持人今日揀咗啲歌送畀我地嘅香港,幫香港打氣。喺過去一段日子裡面有時都會爭扎,自己作為父母都會諗究竟點樣做一個父母呢?點樣好好教曉自己嘅仔女呢?做一個父母都會有佢哋自己心裡面嘅諗法,有時我都會自己問自己係咪做得唔夠好?有時都會覺得自己做得唔好,都希望有辦法可以補過。但係起碼有一樣嘢,我覺得做父母要反省自己做得好定唔好。」說完便播出了他所揀的歌,達明一派的《你真偉大》。

森美所揀的歌是達明一派的《你真偉大》。(森美ig圖片)

而小儀就講了自己切身處地的一個感受,她形容是恐怖的:「喺6月10日凌晨,我半夜喺灣仔,突然聽到好大聲嘅叫囂,令我感受到大家嗰種慌忙同慌張,同平時我認識嗰一帶嘅平安感覺好唔同,平安嘅感覺無咗。」此時森美表示小儀近日有家人過身了,對於她來說是很傷痛的事,森美說:「香港人傷痛嘅事已經夠多,點解要去平添多個 (傷痛事) 呢?」小儀所揀的歌是新青年理髮廳的〈這個家〉。不少聽眾都表示多謝年青人為香港人的付出,讚他們好勇敢。

小儀所揀的歌是新青年理髮廳的〈這個家〉。(小儀ig圖片)

有位劉牧師表示:「喺烽煙瀰漫中見到美麗嘅年青臉龐,感受到佢哋純潔嘅心靈,多謝你哋,我哋絕不絕不離棄你哋,一齊呼吸新鮮嘅催淚空氣,感動我哋嘅心靈。」最後森美說:「相信呢段日子大家心情都好沈重,但係希望大家喺分享當中搵到出口,和平地有盼望地迎接我哋嘅香港,香港人繼續努力,未來嘅日子只要有希望都要繼續向前行,只要有能力都要出一分力,一齊為香港出力。」

森美叫香港人要繼續心存希望向前行。(早霸王facebook截圖)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。