森美自細迷上金庸小說愛不釋手　在武俠世界悟出人生大道理

著名武俠小說作家金庸昨日 (10月30日) 與世長辭，享年94歲，他筆下的小說作品無一不是華人經典，深受大家的喜愛，不少人家中都會有至少一套金庸的著作，甚至全部系列的珍藏。森美呢日就於他的IG上載了一張相，相中是他家中的金庸著作收藏，更是舊版來的，證明森美很早就已經迷上了金庸的小說。

森美留言表示：「在你家中這套書伴你多少年？無邊際的幻想中，我們竟共享同一個江湖！」從相中見到他的收藏入面包括《天龍八部》、《神鵰俠侶》、《鹿鼎記》、《碧血劍》、《飛狐外傳》以及《俠客行》等。而其中有一本打開了的小說更是已經發黃了，見證住歷史留下的痕跡。網民亦紛紛留言同森美分享他們的珍藏。

森美咁迷金庸的小說，他是甚麼時候開始看的呢？他接受《香港01》電話訪問就話：「我係讀中五、中六嘅時候開始睇嘅，啱啱考完會考就成日睇，係睇到停唔到嘅，好有追看性。呢個都影響到我長大後喺創作上，寫故事時知道要留個尾巴延續個追看性，要點樣營造出嚟呢，令我學到嘢。以前寫廣播劇一日一集，就會諗點樣可以做到令人想追睇呢？」

他透露自己第一本睇的金庸小說是《射鵰英雄傳》，是當時的女朋友介紹他睇的：「金庸嘅小說唔係淨係啱男仔睇嘅，好多女仔都鍾意，我屋企套書係我老婆嘅。」他亦有介紹給自己的小朋友睇。

森美更從金庸的小說中悟出了不少人生大道理：「細個睇《鹿鼎記》會覺得好似韋小寶咁就好喇，有咁多個老婆，但係同時間又會覺得到做韋小寶其實都唔容易喎，佢好似橫衝直撞攞到世界上最好嘅嘢，但偏偏喺最好當中都有好多付出同麻煩嘅，令我終於明白到就算得到最好嘅嘢其實都要有好多付出。」

「仲有《笑傲江湖》入面嘅令狐沖，佢練吸星大法要清晒自己嘅內功先練得到，又誤打誤撞先練成最難嗰部分，咁我就會覺得呢個世界就係咁，冥冥中有主宰，佢最想得到嘅吸星大法，如果無受到苦痛係唔會得到嘅，人生都係咁樣，唔好因為你嘅失而太過傷心，就係你嘅失而造就咗你將來嘅得。」

而森美最鍾意的金庸小說改編電視劇就是梁潮偉所主演的《鹿鼎記》，他最喜歡的角色就是韋小寶和令狐沖：「如果可以畀我演到佢哋是旦一個都好，不過依家我都無機會做到金庸筆下嘅男主角㗎喇，如果畀我做到周伯通會覺得真係無憾喇。」