被麥明詩爆與男友不和 馮盈盈即反撃：閂埋房門嗌嗰啲先認真
撰文：吳子生
出版：更新：
麥明詩與馮盈盈今日（2/8）現身將軍澳出席《2019香港小姐競選》行記者會。早前兩位與眾佳麗到熊本進行親親大自然體驗之旅，馮盈盈覺得眾佳麗雖表現相當不俗，但仍有改善空間，而明詩就話：「其中有幾個女仔表演好緊張，可能心中有包袱，因為我哋會見到佢哋鏡頭前，及鏡頭好呈現兩個樣，咁所以希望佢哋俾多啲自信自己，唔好咁拘謹。」
馮盈盈與麥明詩大讚眾佳麗整體表現不俗。（陳順禎攝）
提到日本之旅，兩人情同姊妹有否同房？盈盈直言：「本身我就希望嘅，但有人拒絕囉。」旁邊明詩笑言：「明明一人一間房，間房已經細，仲要兩個人迫埋一齊，雖然係情同姊妹，簡單啲來講，冇理由同一個男仔拍拖，第一嘢就住埋一齊，咁就冇晒個進程，我其實想俾大家有少少個進程。」盈盈晒命還擊：「但我宜家同男朋友一齊住好幸福好sweet喎！」明詩絕地反擊話：「我成日聽到佢同男朋友講電話鬧交。」盈盈反駁話：「廠裡個啲鬧交都係表面，返到屋企閂埋房門嗌嗰啲先認真。」明詩即時諷刺話：「我明，仲要嗌得好大聲，要『嗌』同埋『交』，哈哈！」
麥明詩寄語眾佳麗，要給自己多些自信，才能脫穎而出。（陳順禎攝）