李珊珊拍片分享戰勝驚恐症 「令人窒息感覺直頭覺得係瀕死邊緣」

撰文:
最後更新日期:

淡出幕前7年、被盛傳患腦癌及抑鬱症嘅李珊珊,自年初現身慈善活動,最近又為精神健康基金會拍攝短片,分享早年患病及治療期間的過程,透露曾有「眼前一黑令人窒息的感覺,覺得喺瀕死邊緣。」

李珊珊神隱多年,至今年初終於現身慈善活動。(視覺中國)

全片以默劇形式進行,珊珊手持寫上心聲嘅巨型「大字報」,逐一向公眾分享患病及治療時嘅恐懼,佢話:「2017年,我身處醫院。當時因為種種原因,第一次出現非常激烈嘅病徵,發熱、標冷汗、全身冇力、呼吸困難、不停地掙扎直至眼前一黑。嗰種令人窒息嘅感覺我直頭覺得喺瀕死邊緣。經過唔同嘅檢測,專科醫生都搵唔到病因,病徵持續出現,每日都徘徊地獄又折返人間。兜過唔少冤枉路,做過唔少測試,都係搵唔到病因。」

珊珊分享自己患上驚恐症嘅心路歷程(影片截圖)

珊珊勉勵同路人情緒病其實同傷風感冒一樣有得醫。(影片截圖)

患病後只做兩件事
珊珊慶幸自己無放棄,堅持搵到病嘅根源,「直至有一日經轉介去見劉英傑醫生,我先知道個病係叫『驚恐症』,佢教曉咗我情緒病其實同傷風感冒一樣有得醫,我開始向信得過嘅朋友分享,輕描淡寫地透露我嘅狀況,就好似患咗傷風感冒一樣No big deal。然後我就只係做兩件事,準時覆診、準時食藥。加上好友們嘅關心同不離不棄,病情慢慢好轉,驚恐症嘅症狀無再發生,瀕死邊緣嘅感覺無再出現,我就知道我嘅情況受到控制。」

佢亦邀請眾圈中好友分享自己嘅故事,包括有古天樂、鄭秀文、甘比、林保怡、何超蓮、崔加寶、梁陳女士等等,眾好友為珊珊打氣,亦鼓勵同路人向身邊人講出心中煩惱,踏前分享自身遭遇。

珊珊已經完全從驚恐症陰霾走出嚟,勉勵同路人勇敢面對。(影片截圖)

點擊睇李珊珊搵咗邊啲好友拍片支持:

李珊珊片段全文如下:

「我係李珊珊,I have a story to tell...

2017年,我身處醫院。當時因為種種原因,第一次出現非常激烈嘅病徵,發熱、標冷汗、全身冇力、呼吸困難、不停地掙扎直至眼前一黑。嗰種令人窒息嘅感覺我直頭覺得係瀕死邊緣。經過唔同嘅檢測,專科醫生都搵唔到病因,病徵持續出現,每日都徘徊地獄又折返人間。兜過唔少冤枉路路,做過唔少測試,都係搵唔到病因。

直至有一日經轉介去見劉英傑醫生,我先知道個病係叫「驚恐症」幸好劉醫生教曉咗我情緒病其實同傷風感冒一樣有得醫,我開始向信得過嘅朋友分享,輕描淡寫地透露我嘅狀況,就好似患咗傷風感冒一樣No big deal。

然後我就只係做兩件事,準時覆診、準時食藥。加上好友們嘅關心同不離不棄,病情慢慢好轉,驚恐症嘅症狀無再發生,瀕死邊緣嘅感覺無再出現,我就知道我嘅情況受到控制。

而家睇返轉頭慶幸當初堅持搵病嘅根源,知道問題根源先可以搵啱解決方法。情緒病其實同普通病無分別,搵啱醫生食啱藥,病就自然會好,我選擇行出嚟同⼤家講我嘅故事,係希望有相同遭遇嘅朋友,又或者你身邊有相同遭遇嘅朋友,都可以分享佢哋嘅故事」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。