【萬千星輝2019】入圍12次終奪視帝 馬國明:拍醫療劇好似幾好運

撰文:
最後更新日期:

《萬千星輝頒奬典禮2019》昨晚(12日)圓滿結束,入行21年、奪過三次「最受歡迎電視男角色」並提名過12次視帝的馬國明,終於打破「陪跑」宿命,不負眾望成功憑《白色強人》奪得「最佳男主角」,一嚐視帝滋味。

馬國明2012年憑《On Call 36小時》角逐視帝呼聲極高,可惜最後敗給黎耀祥《大太監》,與視帝寶座僅僅擦身而過,不過今年終於憑同樣是醫療劇的《白色強人》擊敗一眾對手成為視帝,他笑言可能醫療劇與自己較有緣份:「可能觀眾鍾意我做醫生啦,變咗我都覺得自己拍醫療劇好似都幾好運,拍親醫療劇觀眾都幾鍾意睇,所以希望《白色強人》真係有機會開拍第二季啦!」

馬國明多次與視帝寶座擦身而過,今年終於成功「登基」!(葉志明攝)

他表示雖然拍醫療劇需要記很多專業名詞,背台詞可能比較困難,不過自己卻很享受飾演一名醫生:「我又幾鍾意做醫生嘅因為我成日覺得醫生個形象係好好,我哋都做過research,全香港口碑最好嘅政府行業,唔係醫護就係消防,呢兩個行業畀市民嘅印象最高分,所以我有機會做醫生我都真係好開心。」

馬國明表示成為視帝後仍然有很多角色想挑戰,好的劇本都希望能參演。(陳順禎攝)

馬國明在台上發表得獎感言時笑指,媽媽相比起自己爭視帝比較緊張今期六合彩結果,而他得獎後亦未第一時間打電話向媽媽報喜:「我未得閒拎起個電話,但我相信佢好開心,我希望一拎起個電話佢同我講真係中咗8千幾萬啦!(冇人中呀!)咁我阿媽下期一定好雀躍咁話9千萬啊仔!(話唔定你可以將好運帶俾媽咪!)我都希望佢中呀,中左就真係唔洗做啦,哈哈哈!」

馬國明很感激觀眾喜歡《白色強人》。(影片截圖)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。