Pumpkin Jenn街頭派千二支酒精搓手液：有能力就要幫少少手

新型冠狀病毒肺炎（COVID-19）疫情持續，每日確診數字亦不斷上升。YouTuber Pumpkin Jenn和Tawnia今日（3日）就去到街頭向市民免費派發酒精搓手液，Pumpkin Jenn稱：「因為全球都好受影響，如果自己有能力就要幫少少手。咁啱公司就攞到一批貨，就想攞出嚟派畀大家。」Tawnia更講道：「今次會派1200支，其實我哋之前都有去一啲慈善機構到派，同埋而家唔係個個人都可以home office，派酒精搓手液畀佢哋，好似可以盡少少綿力。」

問到自家護膚品牌生意有否受影響，Pumpkin Jenn表示：「好彩我哋都有網上賣嘢，但都有少少影響。各行各業都有受影響，希望（疫情）快啲過。其實本身王麗嘉Irisa（都會嚟），但媽咪始終會比較緊張，所以佢哋都唔出得街。我好耐冇見佢啦，我都好耐冇約人出嚟玩。（會唔會失望？）都明嘅，幫到咪幫，唔出嚟都冇壓力。」