【專訪】譚俊彥減價簽TVB 靠綠葉戴耀明教做戲:唔會覺得有包袱

撰文:
最後更新日期:

譚俊彥(Shaun)2016年加入TVB,之前他在內地發展,回流香港主要想陪伴家人多點。不過Shaun一到TVB便演出男主角,不禁令人懷疑TVB是以高薪簽他回來,他澄清:「其實好意外一嚟就接《天命》呢部劇,簽約時候冇任何條件,人工非常之低,係真㗎。當時覺得冇所謂,喺TVB我可以做其他生意,或者返國內繼續拍劇,冇諗咁多。」當時候Shuan並不了解TVB的運作,在上段提到以為做TVB演員是一件很自由的事,「最後TVB同我講簽親生仔,簽親生仔我就唔可以喺國內拍劇。我覺得呢樣係一種對比,我犧牲某部份事去換我依家擁有嘅嘢。」

Shuan希望有多啲時間陪屋企人。(梁碧玲攝)

人不作出犧牲,就不會得到任何回報。現在Shaun犧牲的是在國內賺錢。毫無疑問Shaun在國內賺的錢比TVB多,他曾透露年輕時在國內工作幾個月就可以足夠一年的洗費,但是自從成家立室後,Shaun最希望多點陪伴家人,「我都有同佢哋講我需要維持我嘅生計先得,不過頭兩年係捱得比較辛苦,當時需要好慳。依家叫做供到兩個小朋友讀書,以前我想換車我可以換車,我睇中隻錶我可以去買錶。可能依家生咗兩個小朋友好多事都要睇緊啲。」最後Shaun強調自己不是一個大富大貴的人,只是比上不足比下有餘。

Shaun笑言以前在國內拍劇時候是一個比較揮霍的人。(梁碧玲攝)

在娛樂圈尋找知心好友是一件困難的事情,譚俊彥表示演員們往往覺得男一只會與男一或者與男二在同一圈子,甚少與三線四線又或者綠葉演員們打交道。但Shaun坦言與幕後人員聚在一起更容易聊得起來。若說到演員中誰是知心好友,他說:「戴耀明可以話係我喺TVB第一個朋友,而唔係同事,我成日都覺得好多係同事係朋友,有好多真心又有好多你明啦(假意)。戴耀明係一個好真心嘅人,有好多人會話你做男一要同男一玩,我唔會呢啲咁嘅事。當時戴耀明同我一齊拍《天命》,佢做我身邊太監,所以就算佢冇對白佢都要係我隔離。咁我返屋企同佢順路,途中都會傾好多,咁我都講過我啱啱簽TVB乜都唔識,我連TVB食飯都唔知係邊食,佢都會好主動帶我食飯同介紹監製我識,慢慢變咗友誼。同埋依家有時我啲戲諗唔明我都會同佢傾,曾經同我講過一句說話我都會諗起,我話呢個角色呢句要點演呢?戴耀明答我『喂,你同你阿媽講嘢,同埋同我講嘢都唔同啦。你每一個情況都唔同,唔好諗咁多。』佢反而俾呢啲意見我,佢一路教緊我。」

Shaun覺得學做戲係無止境嘅一件事。(梁碧玲攝)

Shaun曾經形容在TVB工作就像處身一個淘汰賽,如果腳步放慢,不增值自己,下一個被淘汰的就是自己。「我記得之前演一場戲我覺得幾難,我會走全廠問人。我試過搵黃智賢問點演,我會周圍問人。我唔會覺得有包袱,我希望集中大家意見,唔啱我咪唔用囉。」

【專訪】譚俊彥試過窮到冇錢開飯:幫人影印仲要穿櫃桶底偷兩蚊

點擊睇更多譚俊彥專訪內容照片!

+21
+20
+19


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。