田蕊妮《巨輪》細佬係舞台劇男主角 何遠東入大台被嘲:你咁肥得唔得㗎?

撰文:
最後更新日期:

何遠東曾跟吳業坤(左)在台慶扮棋,但坤哥現已是樂壇新貴,何時到阿東彈起呢?(Instagram圖片)

在兩集《巨輪》都做田蕊妮細佬的何遠東,在新劇《來自喵喵星的妳》亦再出現。「肥」在很多人心目中,已經是一種原罪,何況是以型男索女掛帥的電視台?何遠東無奈地說:「由細到大都知自己唔係主角,所以寧願做隔籬嗰個。」在幕前說不恨當主角,對其他演員來說,可能只是虛偽的客套話,但對於何遠東,這是客觀因素多於一切。

何遠東(右後紅衣)在無綫邁向50週年亮燈儀式雖然企在後排,但已算是踏出了第一步。(林通賢攝)

何遠東表演慾強,鍾意幕前演出,以今時今日窈窕勝於一切的審美觀,他難免被人潑冷水,偏偏在演藝畢業後,同班的幾位靚仔同學卻未能加入電視台,唯獨何遠東卻能留低,那怕只是在台慶扮演一隻棋子。網民記得這隻「棋子」,很大程度是由於同樣扮棋的還有橫掃多個樂壇頒獎禮的吳業坤,做棋一樣可以熬出頭,希望在人間。

何遠東扮演起肥姐維妙維肖,更以肥姐形象演出舞台劇。(Instagram圖片)

對於坤哥以「偽毒」形象彈起,何遠東笑稱沒有大多的「唔忿氣」,反而非常阿Q精神,「當時唔覺有什麼問題,之後好多人話戥我唔抵,其實諗真我在台慶出得最多場,件事幾好玩,又有得計騷呢!」說畢更哈哈大笑,只是反高潮地補上一句「始終我唔係親生仔(非合約藝員)。」何遠東放下舞台,現時能一劇接一劇,先後有《梟雄》、兩輯《巨輪》及《來自喵喵星的妳》,在無綫的潛規則下已經算是異數,而這一切又要多得金牌監製王心慰。

每年無綫都會派人到演藝學院揀蟀,何遠東在自己創作的短劇,由父母、阿婆至到小朋友,一人分飾四角,還要扮埋聲。未幾他即收到無綫通知,叫他到公司casting,「其實無乜特別,我開頭仲以為配音組搵我,都係影完相就走得,而且當時我全副精神放晒在舞台劇上,甚至之後收到王心慰電話留言,也因為太忙未有回覆,當時佢想搵我拍《真相》。」

何遠東《巨輪II》飾演田蕊妮胞弟姚浩男。

何遠東笑言自己「有眼不識王心慰」,其後拍攝對方的劇集,有次拍完後王心慰對他說「你咁演就啱啦,繼續落去啦。」何遠東憶起舊事:「我心諗個女人仲乜同我講嘢?後尾先知原來佢就係王心慰。」何遠東自言自己只是一間大公司的小蕃薯,加入電視台後,亦曾被人說「你咁肥,得唔得架?」、「鏡頭都唔知係邊,下套唔搵你。」別人的揶揄,句句夭心夭肺,但令人難堪的真相是他在電視台確是二打六的綠葉,但在舞台上他卻早已嶄露頭角,甚至在2014年憑《華佗六頂記》獲第23屆香港舞台劇獎最佳男主角(喜劇/鬧劇)提名,在舞台上發熱發亮,但他卻甘心在電視台做配角,他表示:「我唔係想做明星,只係想做一啲角色人哋會記得,知道我係一個演員,能夠俾人講一世嘅角色。」

阿東(右二)在《來自喵喵星的妳》,飾演大配角斐立。

舞台和電視台雖然是兩個不同範疇,但男主角跟綠葉始終不同,何不全職留在舞台那個屬於自己的領域,「坦白講,在舞台劇上提名男主角,當時係好開心,亦都好想攞,當然最後無份啦。但呢次係好好警示,好多時係自己一廂情願,睇番當年自己其實做得未夠好,依家儲多點積分先啦。」何遠東打破肥人等同輪盡的宿命,而且他更精於跳舞,曾在許冠傑的演唱會擔任Dancer,完全是難以想像。

「又係因為讀演藝時,老師同我哋講,做演員要識跳舞、唱歌、做戲,缺一不可,唱歌我有啲信心,但跳舞就…,唔可以因為肥仔就話唔識,所以自己好落力,但我記得有一次要跳踢躂舞,因為我有扁平足,所以就搵嘢紮住腳掌嚟跳,可以幫助平衡,唔可以話我跳得好叻,但如果要演出,我死都要練好佢。」

阿東在《梟雄》中飾演馬國明好友阿龍,在劇集的前半部佔戲甚重。(Instagram圖片)

何遠東往往是做開心果的角色,甚至多次扮演肥姐沈殿霞,現實真的如他表面上嘻嘻哈哈,自得其樂嗎?他表示:「壓力一定有,所以食嘢真係我的死穴,一有壓力我就會一大包薯片係咁食,又或者食M記,依家都想改下呢啲壞習慣,跑步唔啱我,都會踩單車,出身汗減壓。」

「肥仔」固然是他的招牌,但不怕被侷限了角色嗎?何遠東表示:「我諗40歲會試下keep。記得有次坐阮兆祥車,當時佢架車未撞架,我問佢好唔好減肥博一博?他當時話「玩多十年先啦,到時都做咗咁多年戲,咪轉型囉。我都驚到時關節唔得,跳唔到舞。」除了坐祥仔車,他亦會坐陳豪及田蕊妮的順風車,順道向二人請教演戲方法,「佢哋住我屋企附近,順路會車埋我,有乜唔識唔明咪問佢哋囉,視帝視后教我做戲喎,幾威呀。」

阿東是舞台劇的著名演員,更多次擔任男主角,但在TVB卻淪為閒角,圖為《我(不)完美》劇照。(Instagram圖片)

田蕊妮跟阿東私交甚篤,阿東表示:「有視后教戲,幾威呀。」(Instagram圖片)

黃秋生是演藝學院大師兄,阿東更獲秋生讚他在《梟雄》演得不錯。(Instagram圖片)

何遠東表示現時想嘗試更多不同角色,接連兩齣跟馬國明合作的劇集《心理追兇》及《降魔的》,何遠東說跟以往的開心果角色完全不同,希望在頒獎禮有提名,他說:「一直都不是為獎項做戲,有提名當攞咗架啦。(你有信心飛躍男藝員還是最佳配角?)乜鬼都好啦。我依家唔期望出街啲人叫到我全名,叫到角色名都好啦。」

阿東在《降魔的》飾演一個悲劇角色,他叫大家留意他的演出。(Instagram圖片)



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。