【兒童醫院】傳李佳芯被飛出局 監製:公司遲遲覆唔到佢個期

撰文:鄺鈺瑩
出版:更新:
有指李佳芯被飛出重頭劇《兒童醫院》。(IG圖片)

無綫即將開拍新劇《兒童醫院》,除有鄭嘉穎、馬國明、羅仲謙之外,產後首次拍劇嘅鍾嘉欣以及回巢嘅周家怡亦係賣點之一。不過,今日有消息指李佳芯(Ali)原屬該劇女主角之一,但由於劇集很大機會與內地合作,令無綫不敢起用之前捲政治風波而遭封殺嘅Ali,並最終決定搵張寶兒頂上,在劇中飾演麻醉科醫生,與羅仲謙發展為情侶。

鍾嘉欣昨日現身無綫為新劇試造型。(陳順禎攝)

對於被易角一事,《兒童醫院》監製方俊華接受《香港01》訪問時表示確係曾經有意搵Ali:「當初選角時,係有落佢名,但公司遲遲都覆唔到佢個期畀我;至於寶兒的話,一早都預咗有佢,所以並沒有存在頂替之說。」方俊華表示原意等公司覆期後,再決定邊位藝人做咩角色,對於未能與Ali合作而感到十分可惜。其實Ali自去年拍完《愛美麗狂想曲》後,一直未有接拍新劇,但就先後現身過《慈善星輝仁濟夜》、《流行經典50年》等綜藝節目,完全唔似忙到無期。另外,提到近日疫情再次升溫,方俊華亦十分擔心會影響拍攝:「本身想月尾開,但而家場地有少少阻礙,加上呢幾日新增多宗本地確診,所以都有啲擔心。」

張寶兒坦言已收到公司通知,在劇中會飾演一名麻醉科醫生。(張寶兒ig)
+56