【童年回憶崩壞】潔儀姐姐過無綫半年 只演妓女出軌妻：連角色全名都冇！
每次講起亞視經典作品《我和殭屍有個約會》，總會記得長腿馬小玲萬綺雯，今天大家仍然讚她凍齡美魔女，其實當年在亞視，還有主力兒童節目的袁潔儀(潔儀姐姐)跟她叮噹馬頭，若然萬綺雯是魔女，潔儀姐姐肯定是走清純仙氣路線，二人分別在《藍月亮》中擔正，兼且爭奪男一羅頌華，而潔儀姐姐其後主持的《精靈一族》，更讓她成為兒童節目icon。
今年4月，亞視終於壽終正寢，一班服務多年的藝人，隨即被友台無綫羅致旗下，當家花旦袁潔儀必然入選。亞視執笠、ViuTV未成氣候，加盟無綫總有着逼不得已的味道。半年過去，潔儀姐姐總共客串了兩劇，分別是《不懂撒嬌的女人》及《翻生武林》，兩齣劇也相當「破格」，前者要袁潔儀玩一夜情，後者更是演青樓妓女，7、80後睇住潔儀姐姐長大的觀眾，童年回憶瞬間崩壞。
亞視的同期舊同事萬綺雯在無綫的劇集擔正女一，自己卻要做過場角色，在亞視是代表人物之一，卻被無綫當老臨用，甘心嗎？「我冇所謂，有得做咪做囉，已經叫好好彩啦，亞視過嚟都唔使過冷河，即刻有劇拍喎，始終要熟習下個大家庭，唔會計較做乜嘢角色。」袁潔儀更說要多謝無綫，雖然她在兩齣劇中也只是各得三集戲份。
袁潔儀解釋：「其實好有發揮架，以前點會有呢啲角色做，《不懂撒嬌的女人》我雖然演林偉老婆，但神奇地一場對手戲都無，反而講我同袁文傑十年前發生過一夜情，之後好決絕咁無繼續落去。(有床上戲？)唔係好親密嘅，算係情感上出軌。」劇本上袁潔儀的名字是「通妻」(Grace)，全名也欠奉。不過潔儀姐姐仍然看得開，她說：「另一齣劇更好玩，因為有床上戲，我飾演一名過着迎送生涯的妓女，名字也只像代號般叫紅妻，全名都冇。」
嚴格來說，袁潔儀過檔後，還拍過處境劇《愛．回家之八時入席》，飾演只得一場戲的健康舞老師，自己有看過演出嗎？「胡渭康話我知已經播咗，我自己就無睇過。」其實袁潔儀結婚後家在廣州，要拍劇就要坐直通車到港，若然早上5、6點開工，她只得早一晚在娘家過夜，她表示最慘是一次OT收晚上10點，「嗰次連底褲都無得換，就咁去咗阿媽度瞓。」
別人覺得她辛苦，潔儀姐姐卻說她已習慣晒，尤其在亞視年代，已開始北上登台，既然財來有方，何必要在無綫坐冷板櫈？「叫做留個機會，同埋等自己唔好脫節，而且香港人好善忘，唯有咁樣令人仲記得有我呢個藝員。」袁潔儀道。
袁潔儀笑言未有想得太多，什麼獎項、角色，也跟她的姓一樣，隨「緣」。原來袁潔儀跟丈夫在09年，曾經在馬來西亞從事膠樽回收生意，但最終失敗收場，幸好當時她仍有登台，兩夫婦才能度過難關。現時袁潔儀丈夫經營貿易生意，而她自己在無綫拍劇外，亦有接拍電影《極闘II》飾演一名小學老師，還會跟男主角有感情戲，說真的戲份比無綫還要多，只能嘆句現實就是如此無奈。