林子博太太因病手背乾燥瘀黑　接受幹細胞治療：多謝各位有心人

前TVB娛樂主播林子博的太太董燕君（Shirley）19年4月確診罕見癌症「平滑肌肉瘤（腹腔）」，點知同年9月尾TVB決定唔同佢續約，令子博非常徬徨。經過化療電療後，今年8月開始Shirley病情開始惡化，癌細胞擴散，連進食都出現嚴重困難。

雖然身體愈趨虛弱，但Shirley一直堅強面對，更希望到台灣接受「免疫細胞治療」尋求一線生機。但費用昂貴難以負擔，於是子博於上月在facebook公開籌募費用，多得有心人支持好快達標，Shirley亦喺10月6日接受第一針治療。子博留言指：「多謝各位有心人。令我太太今日可以開始，接受『幹細胞治療』。」據子博透露新療程需要兩星期內打四針，喺診所內進行唔使留院，佢表示只擔心太太好似早前接受化療時胃部不適而未能進食而消瘦，希望太太接受完新療程後可以有胃口進食。