【矚目配角】鬼塚富貴傳奇背後有段古 哭訴童年慘況:人點可以賣

撰文:
最後更新日期:

大概「賺錢買花戴」,已經不足以形容鬼塚,甚至低估了身為傳奇時裝設計師的他。2018年以基本藝員合約加入無綫(TVB)之前,鬼塚已經是神級人物,他不僅拍過幾十套戲有「金牌爛仔」之稱,更造衫造到風山水起,家中「波子」、Benz、MGB等名車擺到行唔郁當擺設,80年代一炮過用138萬現金買起九肚山洋房,但03年卻一夜結束整個與他同名的時裝王國;擔任TVB特約演員時,鬼塚又試過揸保時捷靚車返工,後因座駕泊在電視城門外遭抄牌,變相倒貼打工,令同劇台前幕後感到震驚,「咁有米都做茄哩啡」。

場地提供:The Grill Room
特別鳴謝:Barry@relaxdearhk

原名伍健忠的鬼塚,之所以藝名叫鬼塚,是因為有間叫鬼塚的時裝店:「80年代一路都有拍緊啲戲,我英文名叫阿Ken,又有個工作人員叫阿Ken,有次導演叫阿Ken埋位,我就衝埋去,點知唔係叫我。」自此之後,台前幕後均以「鬼塚嗰個阿Ken」稱呼他,久而久之就變成了「鬼塚」。(葉志明攝)

入TVB過日辰 自稱貪慕虛榮

今年66歲的鬼塚直認入TVB做演員除了是打發日辰,更是貪慕虛榮:「我2003年退休,係近年先苦苦哀求個朋友話想拍劇,佢係TVB導演嚟,於是叫我入紙申請,點知入紙一個星期後就有回音,《乘勝追擊》係我第一套拍嘅TVB劇,得一個Shot啫,做收數佬,做完之後嗰啲虛榮心即係返晒嚟!」而最近鬼塚亦有在重頭劇《反黑路人甲》中,飾演「四聯幫」其中一位話事人「馬尾」,不過第18集便正式收工,被姜大衛、陳志健兩父子陷害後慘遭活埋,發揮空間不及之前在《愛.回家之開心速遞》第828集出現的「非洲鼓葉伯」。

點擊下圖觀看鬼塚《反黑路人甲》最後一幕:

+23
+23
+23

小朋友認得非洲鼓葉伯

談起「非洲鼓葉伯」這個角色,鬼塚便顯得眉飛色舞,細說當時的準備工夫:「當時公司畀咗個劇本我,要做一個打非洲鼓嘅伯伯,我返到屋企之後,就攞個廁紙籮,洗乾淨佢,調翻轉喺度打,但係我上網發現原來啲Beat唔係咁樣,仲要嗌啲好特別嘅聲,我而家仲好記得,播出街之後又幾OK,而家啲小朋友見到我,都問我可唔可以一齊影張相,記得我係『打鼓伯伯』,都有少少成就感。」

點擊回顧《愛.回家之開心速遞》第828集「非洲鼓葉伯」演出:

+14
+14
+14

徙置區成長 食教會奶水大

鬼塚在電視上的小小成就,比起當年衝出香港在澳門、北京、上海等地設開分店,一手建立出「鬼塚」時裝王國,可算是九牛一毛,然而他今日所有的一切都不是信手拈來,更是得來不易,因為他的起步點比很多人低。鬼塚出生在50年代、成長於60年代,當時香港人口因偷渡潮和嬰兒潮急劇增加,房屋、醫療和教育遠遠不及需求,小朋友捱餓更是常態,完全不似21世紀的今日。

「我哋住七層樓嗰啲徙置區,邊有機會返學吖。」6歲,剛好是入讀小學一年級的年紀,但是1960年政府還未推出免費強迫教育政策,當時剛好受洗信主的鬼塚只好在天台教會度過童年時光:「朝早一起身就去樓上路德會,有啲校工、校婆倒啲奶水、畀啲餅乾我哋食,咁就咁樣養大我哋,咁樣好好喇,玩一陣間就走,然後周圍玩唔返屋企瞓。」

黑白相中的鬼塚更加有型,當年「黑魔」寶刀未老:

+17
+17
+17

生命中最大心結 「人點可以賣」

一屋十兄弟姊妹,理應一同開心成長,但排第六的鬼塚卻沒有這個福份,成長期間,親眼看着四姊、七妹和十弟被「送」走。生活平穩後,他亦嘗試過找回一班失散兄弟姊妹:「我曾經同九仔(大律師伍健民)傾過,搵到返嚟又點呢,算啦,由佢啦,命運都安排咗。當年唔係淨係我哋,有好多家庭都係咁,唔係點樣有飯食。(有傳係100蚊賣走十弟?)我真係唔知,我只係知道之後有飯食。」

問到鬼塚這段經歷是否人生中最大心結時,他開始雙眼通紅,更數度用紙巾印走幾近奪眶而出的淚水,他哽咽道:「有邊個想,冇飯食呀!係好痛,人嚟㗎,點可以賣!」相信當時鬼塚的腦海正不斷回想60多年來的一切,所有的苦與樂同時侵襲心頭:「細個係好困難,困難到係要去偷香蕉,如果唔係冇得食;我而家有嘅嘢,都係我應該要,我冇做壞事,我由石硤尾住到九肚山有兩棟,係我自己真金白銀買,我要話畀自己聽,你得架,你真係得架。」

鬼塚十分大情大性,對朋友更是「唔話得」:「同我做朋友,永世嘅,但係你呃過我一次,一次咁多,我已經唔會再愛你,唔會畀機會你再埋嚟。」(葉志明攝)

用愛彌補童年遺憾

也許是童年不順遂,鬼塚對自己的初戀女友──即是現在的老婆,以及一對仔女格外寵愛,就像以另一種方式,彌補那時候的遺憾:「好多人都會問,點解我屋企嗰種家庭溫暖,同其他人係唔同,因為我啲小朋友一返嚟屋企,係會攬住我嚟錫,『爸爸,I love you』。(點樣教?)其實我真係冇份,大概就好似以前老人家咁講,乖嘅小朋友教唔壞,壞嘅小朋友教唔好,其實最重要都係我老婆功勞,佢好好,好固執去管佢哋嘅教養,到而家都跟進佢哋嘅仁義道德,佢哋一個男拔,一個女拔,都係唔關我事。」

鬼塚笑指自己屬「娛樂組」成員,放假時總趁老婆外出工作,帶小朋友到後山玩溪水:「個仔而家就做獵頭公司,個女就輾轉之後話想幫手睇媽咪間補習社,佢哋真係好孝順。」

鬼塚一家四口相處融洽,大女和細仔分別在拔萃女書院和拔萃男書院畢業,不但各有成就,亦非常孝順父母。(鬼塚提供)

又肥又矮 靠把口追初戀老婆

鬼塚雖然沒有親口承認,認識到老婆是其畢生最大的幸事,但談起結婚35年的老婆,他總是掛起笑臉:「我娶咗一個好好嘅老婆!」鬼塚自認當年又肥又矮,滿臉鬍鬚核核突突,「照鏡都想打自己」,所以追女仔純粹是靠把口:「當年拎住個篋周圍做嘢,我哋做Tailor,上門度身訂做,間公司執咗好耐喇,叫巴黎狄龍,咁周圍敲門問人使唔使造衫,咁啱嗰陣又冬天,佢又想造,咁就做咗畀佢呢個客仔,咁我梗係好耐先交畀佢啦,可以成日打畀佢吖嘛。(娛樂圈大染缸,老婆唔擔心你曳曳?)邊度會有人鍾意我,我低下層演員嚟,當年入行都係因為修哥(胡楓)覺得生得樣衰,所以先捉我拍《打藤》。」

鬼塚在1978年與老婆開始談戀愛,拍拖7年後正式拉埋天窗,當時並沒有正式求婚,他笑言之後的35年也沒有浪漫過:「佢同我一路做嘢已經當浪漫,而家係好過以前,行街要拖實佢,食飯又顧住佢。佢都成日鬧我㗎,話我掛住玩,一陣又賽車,一陣又潛水,一陣又飲酒,話我太多朋友。」(葉志明攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。