陳凱琳歲半大仔Rafael返名牌Playgroup 感慨:覺得時間過得太快

撰文:洪曉璇
出版:更新:
陳凱琳鄭嘉穎家有兩個仔,一個係歲半嘅鄭承悅(Rafael)一個係兩個幾月嘅鄭承亮(Yannick)。(IG:@ghlchan)

2020年係相當難捱嘅一年,疫情影響下小朋友連走到戶外呼吸新鮮空氣嘅機會都少之又少。陳凱琳先後誕下兩個囝囝,大仔Rafael鄭承悅已經一歲半,開始為報PN班做準備。呢日Grace貼出Rafael返名牌Playgroup嘅相,既感慨又安慰。

話咁快陳凱琳大仔已經返Playgroup。(IG:@ghlchan)
+12

陳凱琳貼出Rafael上堂嘅相片,見到Rafael眼仔碌碌玩車仔,雖然戴住口罩但瞇瞇眼都睇得出佢笑得好開心。Grace用英文留言話:「最近見到好多人分享小朋友返學校嘅相,好肯定大家同我一樣,覺到又激動又擔心又開心,不過當見到自己仔女學習新事物嘅時候笑得好開心,見證到佢哋成長,又會不由自主地覺得自豪,但同時又覺得時間過得太快,好期待將來有咩事會發生喺囝囝身上。」

陳凱琳貼出呢一張囝囝專心玩車車嘅相片,透露讀緊名幼Tutor time Playgroup。(IG:@ghlchan)

睇返Rafael讀嘅呢間Playgroup來頭相當唔簡單,Tutor Time係名牌幼稚園多多國際幼稚園旗下Playgroup,收費由三千至八千五一個月不等,如果一星期上一堂的話每堂要價高達$740﹗陳凱琳囝囝讀緊北角寶馬山分校,同屋企距離好近,唔知嚟緊PN班仲會考慮邊啲名牌幼稚園呢?

陳凱琳幫囝囝揀嘅名牌playgroup,地方相當闊落,收費仲比市面上貴幾倍。(Tutor Time官網截圖)