盤點家中擁私人花園藝人 郭富城草地野餐歎世界特別chill
疫情下嘅郊區成為市民消遣好去處,大棠楓香林、流水響水塘更係大熱之選。之不過,如果屋企有個私人花園的話,真係隨時隨地都可以呼吸到新鮮空氣,而且仲唔使同人迫。就好似許廷鏗咁,獨立屋一開門,就係私人花園,無論係同父母high tea定同外甥女玩,都絕無時間限制。而其實除咗許廷鏗之外,原來唔少藝人屋企都有秘密花園。
邢李㷧為老婆林青霞送上嘅11億皇宮,位於飛鵝山山腰側,裡面有齊室內、室外游泳池、私人影院、網球場、圖書館等等,天台被女主人設置成農場,令一家人隨時可以享用到有機蔬菜,而皇宮外嘅私人花園,就連仙鶴都忍唔住要參觀一下,早前林青霞在微博上載仙鶴在花園展翅飛翔嘅照片,即時引來網民嘅討論。
喺屋企自設農場嘅仲有楊卓娜,同老公而家三位愛女住西貢獨棟村屋嘅佢,將屋企天台設置成小型農場,由蔬菜、水果到鮮花應有盡有。而佢亦不時分享同囡囡一齊「落田」嘅照片。
同樣將私人花園用作農場嘅,仲有譚凱琪。早前佢為女兒舉行百日宴時,地點就係逾千呎嘅後花園,呢個花園大到可以放下旋轉木馬,真係十分跨張。而呢個「兒童樂園」前身,曾被譚凱琪當作農場,仲種埋薑煲湯,好健康。
Patrick Sir(林溥來)2019年買入嘅獨立屋面積1123方呎,附有花園,由於地勢較高,環境清幽且享有超開揚靚景。Patrick Sir不時同老婆喺花園用餐,而愛犬DonDon亦不時喺花園散步,一家都十分識享受。
孫耀威同老婆所住嘅獨立屋,唔止有私人花園,連私家𨋢都有。400呎嘅私人花園,放有沙發、茶几及太陽傘,想點玩都得。
郭富城早年買入嘅大坑道嘉園頂層連天台,他將天台一邊改建為籃球場及泳池,直到愛女誕生後,他將籃球場部分改為花園,不過,最大受益者,似乎係老婆方媛,早排頻頻喺私人花園拍VLOG,影片所見,天台除有大型彈彈床之外,亦種有不少植物。
於2015年下嫁金融才俊嘅李蘊(Renee),婚後移居廣州專心相夫教子。住複式別墅嘅佢,豪宅有大型前後花園及露台,花園內更栽種名貴的羅漢松,甚具氣派。