七仙羽師傅今晚（18/2）現身銅鑼灣出席電影《哪吒之魔童鬧海》首映禮。對於保錡大年初一，在社交平台分享一張與「阿叻」陳百祥合照，並以「ViuTV叻仔」自居，引來大批粉絲不滿現脫粉潮。加上近日菊梓喬被發現IG取消關注保錡，陷分手疑雲。報道出街後，不足一日又再復交。

七師傅接受《香港01》訪問時表示：「其實佢同菊梓喬未開始又如何結束呢？但你話佢哋兩人本身夾唔夾呢，我知保錡事業心係好重，嚟近佢又好多嘢忙，變咗佢冇乜時間搞男女感情，因為男女感情係要用好多時間去相處，如果冇時間去相處，肯定會出現好多問題同誤會，就好容易鬧交。況且我睇保錡今年係冇桃花。（會唔會佢太過多口，菊梓喬唔鍾意？）其實菊梓喬同佢有冇嘢我都唔知，因為我冇問保錡，私底下都冇。（會唔會訓示吓佢？）如果我叫佢檢點吓，佢會話我，然後會反駁我邊有唔檢點，我邊有做錯嘢，啲人要話我就由佢。其實我知佢嘅性格，佢份人好固執同埋好硬頸，未必講咩都聽。」