古佩玲（Kelly)今日（19/2）現身電視城出席無綫處境喜劇《愛·回家之開心速遞》宣傳造勢活動，對於早前有人在網上大爆她在《愛回家》每集薪酬5000元；比同劇演員「三太」樊亦敏的每集片酬4750、呂慧儀（飾熊若水）的4500元還要高，成為女演員單集片酬之冠。

古佩玲就事件接受《香港01》訪問時笑言：「其實我片酬唔高，反而我希望日後可以賺到咁嘅錢，因為目前真係未有嘅，但我好希望可以賺到咁多。（事件會否帶來影響？）都冇嘅，我覺得都好開心，我就喺度諗，如果我真係有咁嘅價，計一計條數我都開心喎，於是我就往住呢個目標去進發。同埋我哋個個都有睇呢單新聞，佢哋個個都話我，原來我有咁嘅價，成件事大家都覺得好笑嘅。不過我睇到呢單新聞嘅時候，我係好驚訝，如果真係有咁嘅價，我就真係發達。」