李龍基大爆未婚妻王青霞獄中暴肥　期待7月出獄團聚：真係好開心

李龍基（基哥）今日（22/2）現身黃埔出席新城電台節目訪問。提到即將在2月25日於香港文化中心音樂廳舉辦「李龍基笑看人生演唱會2025」，基哥在接受《香港01》訪問時表示十分期待：「歌單同道具呢幾日都搞掂晒，而服裝方面佢哋都話聽日搞掂埋，變咗所有嘢都準備得9999。（開騷前是否拒接其他騷？）其實開呢個騷前3幾個月，都推晒所有工作，集中火力喺呢個演唱會上，希望唔會令大家失望。」

問及未婚妻王青霞在獄中的近況，基哥表示：「因為裏面提供嘅食物好多澱粉質，有一輪佢係肥咗好多，而佢都話自己都要Keep返。（你想佢肥啲？）咁又唔好太肥，但我見佢都真係飽滿咗，因為裏面澱粉質係比較多，相反蔬菜就比較少。（將近7月放監心情如何 ？）佢心情好好多，因為一個人最低限度要有期盼，仲有3個月少少都可以出返嚟，真係好開心。」