羅霖爆有理事出席活動被男士攬腰抽水 提醒女士們要懂得保護自己

仁美清叙主席程瑤（Donna）和榮譽主席羅霖今晚（25/2）現身灣仔出席「仁美金蛇迎新歲」仁美清叙春茗暨就職晚宴。羅霖接受《香港01》訪問時表示：「今年嘅春茗諗住預六圍枱，冇諗過反應咁踴躍，個個都話要參加，而尋晚Donna又話又要加多一圍。其實仁美清叙由91年到而家，到由我哋重組到而家都有16年。而做慈善根本唔容易，能夠做到咁多年，全靠堅持，加上冇咗亞視，就更加要靠你哋去報道，繼續幫我哋仁美清叙繼續延續落去。」

此外，羅霖亦提到早前有多位理事出席活動時，被在場男士主動埋身攬腰影合照，行為令人不安：「其實我哋如果面對呢啲咁嘅情況，我哋可以輕輕咁扭一扭個身體去避開，唔好被人抽水，我哋女仔真係要懂得去保護自己，每當我遇到呢啲情況，我都用縮骨功去避開。唔單止呢啲場合，喺交通工具上都要保護自己。」