楊證樺沈可欣兩夫婦相知相許十數載，是圈中出名的模範夫妻，婚後育有兩個囝囝，一家四口非常幸福。3月12日是沈可欣50歲生日，她照常拍攝工作本以為平淡度過，回家後收到大驚喜令她非常心甜。

沈可欣在IG分享，生日正日工作後與朋友食飯，回家時一開門全屋熄晒燈：「突然間我兩個仔分別喺房同埋梳化旁邊跳出嚟，攞住份禮物同我講Happy birthday，當刻真係好意外好驚喜！我冇諗過兩個仔會咁樣做！首先佢哋搵咗屋企嘅食物自製咗一個生日蛋糕俾我，然後佢哋各自創作咗份生日禮物俾我，仲包得好靚，就係用舊嘅I phone盒放咗自己部電話入去，當係送左部電話比我，創意無限！」

窩心驚喜令媽媽沈可欣非常開心，心思比名貴禮物更令她感動：「盒內裏哥哥畫左我喜歡嘅三眼仔比我，細佬就畫咗大吉大利的圖畫，同埋整咗條寶石頸鏈比我！佢哋細心到，一直開住電子琴嘅音樂，去襯托成件事！之後我對佢哋講我非常之欣賞佢哋所做嘅一切，然後細佬同我講：「爸爸都會咁對你！」我聽到呢句感動到想喊！因你也感受到爸爸對我的愛！」