王晶獲「鐵板神算」董慕節批命呻搵笨 梁思浩指對方做少一樣事

王晶近年開YouTube頻道「王晶笑看江湖」大爆娛樂圈秘聞。早前一集王晶就談到圈中兩大術數奇人，其中一位為早年仙逝，享壽101歲的「鐵板神算」董慕節先生。王晶指當年搵過對方算命，獲批只有65歲命，最終與事實不符：「記得倪匡睇完就話40幾歲就死。佢就80幾歲先死，即係多咗40年，所以佢唔信，覺得係搵笨。」惹起網上熱話。

曾經搵過董慕節批命的梁思浩今日（25/3）現身將軍澳電視城出席TVB Plus《直播靈接觸》宣傳活動，就事件接受《香港01》訪問時表示：「其實我覺得無論幾準嘅師傅 ，都要同嗰個人有冇緣份。（當年算到有幾多歲命？）應該比晶哥長命少少啦。不過晶哥佢係講得啱嘅，就係算到最後就會有呢兩句『南極仙翁來保奏，北斗星犀把壽添』，嗰陣時我都冇問師傅點解？佢就會話我夠鐘。其實佢係有最後一句，我諗當時晶哥攞完張批命書之後冇再返去搵佢，因為我有攞返本命書返去搵師傅，而師傅就話我計就計到呢度，之後去唔去到多十年，就要睇自己嘅功德同功課。（晶哥話佢講嘢好玄你覺唔覺？）其實所有高人講嘢都好玄，咁所以你自己諗啦。」