袁文傑今日（19/8）現身電視城出席無綫處境喜劇《愛．回家之開心速遞》宣傳造勢活動。對於亞視前高層盛品儒（James）昨日驚爆死訊，終年48歲，遺下一對年幼子女，由愛妻蔡一鳳獨力照顧，事件令人十分哀痛。

袁文傑接受《香港01》訪問時表示：「其實喺死訊之前幾日，我係收到蔡國威電話，話佢就嚟唔得，我就問佢咩事？點知尋日就傳出死訊。令我諗返起有一次要行百萬行，晨早喺北角區出發，諗住搭的士過去，突然間就見到公司嘅高層盛品儒先生坐住部公司專車等，然後就開口叫我上車，沿途大家都一直有傾偈，佢為人好友善，加上十幾年前佢仲要後生仔，變咗大家係好傾得埋。」

文傑又指當年盛品儒領軍亞視，令公司同事上下一心：「記得當年佢領導我哋嘅時候，我就覺得有一個咁有型格嘅人出嚟嘅時候，係對亞視有幫助。聽舊同事講，佢為人好友善，同埋做事好公平，唔會因為自己係管理層，鍾意點就點。佢係平等化去對待每一個人，而我就覺得唔係咁多人係可以做得到，但佢做得到，完全係冇年少氣盛嗰啲態度。同埋佢兩個小朋友要乖，媽咪之後落嚟都辛苦，咁睇吓嚟近我哋一班舊同事睇吓有咩表示，我亦希望可以參與得到。」